Нам улууһун Таастаах нэһилиэгэр устуоруйаҕа умнуллубат «Ала ууһун ыһыаҕа» үрдүк таһымҥа ыытыллан, өрөгөйдөөхтүк түмүктэннэ!
Улуу Атамай ууһун аатын илдьэ хаалбыт Горнай улууһун Атамай нэһилиэгиттэн 28 киһилээх дэлэгээссийэ баран, бу кэрэхсэбиллээх ыһыахха көхтөөхтүк кытынна.
Биир силистээх, биир өбүгэлээх нэһилиэктэр – Нам улууһуттан Таастаах, Хомустаах, Партизан, Салбаҥ уонна Горнай улууһуттан Атамай, Одуну муһуннулар. Ала ууһа Атамай архыып докумуоннарынан Кэбээйи, Горнай, Нам сирдэринэн тайаан сыппыта былыргы кэмтэн биллэр. Бу курдук төрүт устуоруйаны кэрэхсиир дьон, кинилэр кэнчээри ыччаттара түмсэ сылдьаллара олус кэрэхсэбиллээх, үтүө холобур буолар!
Устуоруйа умнуллубат! 2023 сыллаахха Атамай нэһилиэгиттэн ыытыллыбыт эспэдииссийэ Москваҕа баран, 1632 сыллаах «Атамайская волость», «Атамайский улус» диэн элбэх суолталаах докумуоннары булан кэлбитэ, биһиги устуоруйабыт дириҥин өссө бигэргэттэ.
Ыһыах кэмигэр Ала ууһун дьоно мустан, элбэх холбоһуктаах кэнсиэри көрдөрдүлэр, тимир уһаардылар, Ала боотурдара күүстэрин холостулар.
Атамай нэһилиэгин дьонун ситиһиилэрэ:
• Хапсаҕайга Атамай боотура Эрчимэн Максимов тэҥнээҕин булбата, ыраас кыайыыны ылан убаһанан наҕараадаланна!
• Хомуска Александр Максимов үһүс үктэлгэ тигистэ.
• Кэрэ куоларга Сааскылаана Жиркова үһүс үктэли ылла.
• Оҕунан ытыыга Атамай хамаандата үһүс үктэлгэ таҕыста.
• Мас тардыһыыга Нургустаана Федотова кыайыылаах аатын сүктэ!
• Саха таҥаһын көрүү күрэҕэр Прокопий уонна Мария Яковлевтар дьиэ кэргэттэрэ, Роман уонна Надежда Федоровтар дьиэ кэргэттэрэ анал ааты ыллылар.
Бу курдук Ала ууһун ыһыаҕа нэһилиэктэрбит сомоҕолоһууларын, төрүт үгэстэрбитин сөргүтүүнү, кэнчээри ыччаты иитиини бигэргэттэ.
Өрөгөй! Кэлэр сылга! Бу ситиһиилэринэн эрэ муҥурдаммакка, 2027 сылга Ала ууһа Атамай үбүлүөйдээх 395 сыллаах ыһыаҕа Атамай нэһилиэгэр ыытыллар буолбутун үөрэ-көтө иһитиннэрэбит!
Айсен Павлов,
Атамай нэһилиэгин баһылыга
Хаартыскалар Атамай нэһилиэгин дьаһалтатыттан