Инвестициялары тардыы, бөдөҥ инфраструктуралаах бырайыактары олоххо киллэрии уонна судаарыстыба өйөбүлүнэн үлэлиир мэхэньиисимнэри хаалларыы Уһук Илин сайдыытын тутаах хайысхаларынан буолуоҕа.
Бу боппуруостары РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илин ФУо боломуочуйалаах бэрэстэбиитэлэ Юрий Трутнев салайааччылаах Уһук Илиннээҕи ФУо Сэбиэтин мунньаҕар дьүүллэстилэр.
Мунньахха Юрий Трутнев уларыйа турар экэнэмиичэскэй быһыы-майгы усулуобуйатыгар саҥа ыҥырыылары учуоттаан макроэрэгийиэн сайдыытын былааннарын кэмигэр көннөрөн иһэр наадатын бэлиэтээтэ. «Быһыы-майгы тэтимнээхтик уларыйан иһэрин үчүгэйдик өйдүүбүт уонна үлэбит былааныгар ону учуоттуохпутун наада», — диэн эттэ Юрий Трутнев.
Сэбиэт кыттыылаахтара Уһук Илин куораттарын маастар-былааннарын олоххо киллэрии, энэгэтиичэскэй уонна тырааныспар инфраструктуратын сайыннарыы, эрэгийиэннэри уматыгынан хааччыйыы, ол иһигэр хотугу тиэйиигэ, бырамыысыланнаһы өйөөһүн уонна аныгы технологиялары киллэрии боппуруостарын көрдүлэр.
СӨ Ил Дархана Айсен Николаев Уһук Илин сайдыытыгар үлэлиир мэхэньиисимнэри сэргэ, аныгы экэгэмиичэскэй усулуобуйаҕа кэмигэр сөп түбэһиннэрэн иһэр наадатын тоһоҕолоон бэлиэтээтэ.
—«Ити инвестиционнай бырайыактары олоххо киллэрии, инфраструктураны саҥардыы уонна дьон олоҕун хаачыстыбатын үрдэтии үрдүк тэтимин оннунан хаалларыаҕа. Саха сиригэр уматыгынан эрэллээхтик хааччыйыы, ол иһигэр хотугу тиэйии чэрчитинэн, куораттар маастар-былааннарын олоххо киллэрии, энэргэтиичэскэй инфраструктураны саҥардыы уонна саҥа инвестиционнай бырайыактары үлэҕэ киллэрэргэ усулуобуйаны тэрийии сүрүн суолталаах. РФ Бырабыыталыстыбатын, Арасыыйа Бэрэсидьиэнин Уһук Илин ФУо боломуочуйалаах бэрэстэбиитэлистибэтин уонна РФ Уһук Илини сайыннарыы министиэристибэтин кытта ыкса бииргэ үлэлээһининэн, РФ Бэрэсидьиэнэ туруорбут сыалын-соругун ситиһиигэ уонна дойдубутун бөҕөргөтүүгэ кылааппытын киллэрэн, бу соруктары утумнаахтык быһаарыыны салгыахпыт диэн эрэнэбин, — диэн Айсен Николаев бэлиэтээтэ.
Сиһилии: https://www.sakha.gov.ru/news/57061
СӨ Ил Дарханын уонна Бырабыыталыстыбатын пресс-сулууспата
Хаартыска: sakha.gov.ru