Бэс ыйыгар ИДьМ Нерюнгри оройуонунааҕы салаатыгар Амур уобалаһын 27 саастаах олохтооҕо сайабылыанньа суруйбут. Сайабылыанньатыгар түөкүттэргэ түбэспитин, кинилэр албыннарыгар киирэн 8 мөл. 740 тыһ. солк. былдьаппытын иһитиннэрбит. Дьахтар анал байыаннай дьайыыга суох буолбут кыттыылаах огдообото буолара, соҕотоҕун 1-8 саастаах үс кыра оҕону иитэрэ биллибит.
Түөкүттэри кытта кэпсэтии “байыаннай комиссариаттан” диэн ааттаан төлөпүөнүнэн эрийбит кэпсэтиилэриттэн саҕаламмыт. Салгыы кэпсэтиигэ «Росфинмониторинг» уонна «ФСБ» үлэһиттэрэбит диэн кыттыспыттар. Дьахтары өлбүт кэргэҥҥэр көрүллүбүт харчыгын барытын устан, анал сулууспаҕа тиксэр диэн тылларыгар киллэрбиттэр.
Дьахтар ыам ыйыгар 4 мөл. солк. тахса сууманы түөкүттэргэ ыыппыт, хаалбыт иккис аҥаарын бэс ыйыгар тиксэрбит. Түөкүттэр огдообо эпиэкэ уорганын көҥүлүнэн дьиэ атыылаһабын диэн оҕо счетуттан харчы устарын бэрт тулуурдаахтык кэтэспиттэр.
ИДьМ Нерюнгри оройуонун үлэһиттэрин суһал-көрдүүр тэрээһиннэрин иитинэн дроппер ким буоларын быһаарбыттар. Бу 26 саастаах, чугас дойду олохтооҕо, “Толмачево” уонна “Чульман” аэропортарынан Амур уобалаһын Тында куоратыгар иккитэ кэлэ сылдьыбыт киһи буолара быһаарыллыбыт. Нерюнгри оройуонуттан ыаллыы турар Тындаҕа тахса сылдьан, кистэммит харчыны ылбыт.
Суһал көрдүүр үлэһиттэр иккис кибер түөкүн ким буоларын быһааран, “суһал сулууспа үлэһитэбин” дэнээччини, эмсэҕэлээччи 8 мөл. 740 тыһ. солк. суумалаах харчыны тиксэрбит киһитин эмиэ туппуттар. Бу 19 саастаах эмиэ чугас дойду киһитэ эбит.
РФ Холуобунай кодексын 159 ыст. 4 ч. (“Түөкүннээһин”) холуобунай дьыала тэриллибит. Бу туһунан ИДьМ МАХ-ханаалыгар суруйаллар.