СӨ Бырабыыталыстыбата эрэгийиэни уматыгынан хааччыйыыга кэккэ миэрэлэри олоххо киллэрэр. Үлэ биир сүрүн хайысхатынан Саха сирин соҕурууҥҥу өттүгэр ньиэп бордууксуйатын тириэрдиини түргэтэтии буолар.
Гражданскай оборуона дьыалаларын уонна нэһилиэнньэ олоҕор-дьаһаҕар куттал суох буолуутун миниистирин солбуйааччы Никита Павлов брифинг кэмигэр иһитиннэрбитинэн, билигин уматык туспа баартыйаларын тиэйэн ыытыы болдьоҕун эрдэтээҥҥигэ көһөрүүнэн ньиэп хампаанньаларын уонна тириэрдээччилэри кытта үлэ барар.
“Бүгүн сүрүн соруктартан биирдэстэринэн – Саха сирин соҕуруу өттүгэр ньиэп бородууксуйатын саҥа кээмэйин төһө кыалларынан түргэтэтии. Тириэрдээччилэри кытта уматык былааннаммыт баартыйата өрөспүбүлүкэҕэ кыраапык иннинэ аҕалылларын туһугар, болдьоҕун иннинэ тиэйэр кыаҕын көрүүгэ үлэлэһэбит. Оччотугар саппаас түргэнник туолуо уонна Алдан, Нерюнгри оройуоннарын уматыгынан хааччыйыы үрдүөҕэ” – диэн Никита Павлов иһитиннэрэр.
Миниистири солбуйааччы бу үлэ номнуо ылыныллыбыт миэрэни кытта сэргэ барар диэн бэлиэтиир. От ыйын 18 күнүттэн өрөспүүбүлүкэ соҕуруу оройуоннарын хааччыйар логистическай сүрүн ситиминэн буолар Томмоттооҕу «Саханефтегазсбыт» АУо ньиэп баазатын саппыраапкалыыр ыстаансыйаларыгар сууккаҕа бэриллэр уматык лимиитэ үрдэтиллибитэ.
Ону таһынан, тыа хаһаайыстыбатын табаары оҥорон таһаарааччыларын дизельнэй уматыгынан хааччыйыы салгыы барар. Бастакы түһүмэххэ 19 оройуон уонна Дьокуускай куорат хаһаайыстыбаларыгар 844,5 туонна уматык үллэриллибитэ. Бу туһунан Ил Дархан уонна Бырабыыталыстыба пресс-сулууспата суруйар.