Эбээн Бытантай улууһун Кустуур сэлиэнньэҕэ балачча уустук сайын ааһан эрэр. Уулара үчүгэйдик түспэт уонна күн өрүү-өрүү кэлэр ардахтар отчуттары мэһэйдииллэр.
— Ол да буоллар, аҕыйах дьон окко киирдэ. Кыһалҕаттан, хайыахтарай, уулаах сиргэ оттоон баран, кураанах сиргэ отторун үрдэриллэр оҥочонон эҥин состорон таһаараллар. Дьиҥэ, атырдьах ыйыгар күн-дьыл туран биэрдэр, кыстыкка сөп буолар оппутун булунарга турунуо этибит. Атын сиргэ улахан бугуллары оҥорор буоллахтарына, биһиги эппэ диэн ааттаан, кыра бугуллары чөкөтөбүт. Онтон, дьэ, кэбиһэбит, — диир нэһилиэк баһылыга Константин Иванович Старостин.