Сунтаар улууһун баһылыга Анатолий Григорьев салайааччылаах дэлэгээссийэ анал байыаннай дьайыы зонатыгар сылдьар биир дойдулаахтарбытын кытта сирэй көрсүһүүлэрин түмүктээтэ. Айан тиһэх түһүмэҕинэн Саха сирэ киэн туттар «Боотур» батальонун байыастарын кытта көрсүһүү буолла.
Байыастар туруорсубут көрдөһүүлэринэн уонна сайаапкаларынан, фронт инники кирбиитигэр олус наадалаах 4 саҥа матасыыкыл тириэрдилиннэ. Байыаннай сулууспалаахтарга маннык суолталаах көмөнү олохтоох урбаанньыттар уонна нэһилиэк дьоно биир сомоҕо буолан, бэйэлэрин баҕаларынан үп-харчы хомуйан атыыластылар. Салайааччылар бэлиэтииллэринэн, билиҥҥи уустук кэмҥэ маннык түргэн сырыылаах-айаннаах тиэхиньикэни тиксэрии уоттаах кирбиигэ сылдьар уолаттарбыт олохторун харыстыырга, байыаннай сорудахтары ситиһиилээхтик толороллоругар улахан суолталаах.
Тиэхиньикэттэн уонна байыаннай тэриллэртэн ураты, байыастар төрөөбүт дойдуларын сылаас тыыннаах минньигэс аһын-үөлүн, өбүгэ үгэһин-күүһүн иҥэриммит саха быһахтарын, ону тэҥэ төрөөбүт улуустарын былааҕын улахан үөрүүлээхтик, махталлаахтык туттулар. Бу бэлэхтэр хас биирдии саха саллаатыгар дойдутун кытта ситимин өссө күүһүрдэр, сүргэтин көтөҕөр уонна кыайыыга кынаттыыр улахан өйөбүлүнэн буолаллар. Сунтаар улууһун дьоно-сэргэтэ инники кирбиигэ сылдьар уолаттарын кытта биир санаалаахтарын, кинилэр дойдуларыгар этэҥҥэ эргиллэн кэлэллэригэр күүс-көмө буолалларын бу айан өссө төгүл туоһулаата диэн Сунтаар улууһун дьаһалтатын пресс-сулууспата суруйар.