Дьокуускай куоракка атырдьах ыйын 12 күнүгэр 10 киһи (ол иһигэр 6 оҕо) аһылыктан сүһүрүү бэлиэлээх мэдиссиинэ көмөтүн көрдөөн балыыһаҕа тиийбит. Эмсэҕэлээбиттэр бары ыарыыларын Дьокуускай киоскаларыттан биирдэстэригэр шаурма атыылаһан сиэбиттэрин кытта сибээстииллэр.
Ыалдьыбыт дьон уопсай ахсааныттан 8 киһи инфекционнай стационарга киирдэ, оттон 2 киһи амбулаторнай усулуобуйаҕа (дьиэлэригэр сытан) эмтэнэр.
Ыарыһахтар туруктара орто, куттал суох. Наадалаах мэдиссиинэ көмөтө барыта толору кээмэйинэн оҥоһуллар.