Амма улууһуттан анал байыаннай дьайыы бэтэрээнэ Алексей Лобанов «Аҕа дойду көмүскээччилэрэ» Судаарыстыбаннай пуонда филиалын өйөбүлүнэн «Саха сиринээҕи ОДьКХ Амматааҕы учаастагар сыбаарсыгынан үлэҕэ киирдэ.
Алексей Лобанов 2023 сыл ыам ыйыгар Арассыыйа Оборуонатын министиэристибэтин кытта хантараак түһэрсибитэ. Сулууспалыыр кэмигэр взвод хамандыырын солбуйааччытын дуоһунаһыгар сылдьыбыта. 2024 сыл ахсынньытыгар байыаннай сорудахтары толоруу кэмигэр ыараханнык бааһыран, дойдутугар төннүбүтэ. Хорсун уонна эр санаатын иһин «Хорсунун иһин» уонна «Анал байыаннай дьайыы кыттыылааҕа» мэтээллэринэн наҕараадаламмыта.
2025 сыл муус устар ыйыттан бэтэрээн «Аҕа дойду көмүскээччилэрэ» Судаарыстыбаннай пуонда филиалын арыаллааһыныгар сылдьар. Кини көмө көрдөөн туруорсубут бастакы боппуруостарыттан биирдэринэн — официальнайдык үлэҕэ киирэригэр наадалаах үөрэҕин туһунан дипломун чөлүгэр түһэрии буолбута.
«Үлэҕэ киирэрим туһугар миэхэ дьупулуон наада этэ. Мин социальнай координаторым Саргылана Константинова докумуоммун чөлүгэр түһэрэргэ көмөлөспүтэ: Нерюнгритааҕы Соҕурууҥҥу технология кэллиэһин кытта сибээстэһэн, миэхэ тутатына дубликаты биэрбиттэрэ. Бу миэхэ официальнайдык үлэҕэ киирэргэ кыаҕы биэрбитэ», — диэн кэпсээтэ Алексей Лобанов.
Докумуонун чөлүгэр түһэрбитин кэннэ, бэтэрээн идэтинэн үлэтин салгыыр кыахтаммыта уонна билигин кини ОДьКХ Амматааҕы учаастагар сыбаарсыгынан үлэлиир. Социальнай координатор көмөтө ону тэҥэ дьиэ-уот уонна мэдиссиинэ боппуруостарын быһаарыыга эмиэ туһаайыллыбыта. Ааспыт сылга Саргылана Константинова бэтэрээн дьиэтин киин ититэр ситимҥэ холбуурга докумуоннары бэлэмнииргэ көмөлөспүтэ. 2026 сыл бэс ыйыгар кини өйөбүлүнэн Алексей Лобанов Тюмень уобалаһыгар баар «Тараскуль» кииҥҥэ мэдиссиинэ реабилитациятын куууруһун ааспыта.
«Пуонда филиалыгар уонна бэйэм координаторбар Саргылана Семеновна Константиноваҕа сыралаах үлэтин, болҕомтотун уонна кыһамньытын иһин махтаныахпын баҕарабын. Мин кыһалҕаларбын кытта соҕотох хаалларбатаххытыгар улахан махтал», — диэн бэлиэтээтэ бэтэрээн.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.
