Саха сиринээҕи Өрөспүүбүлүкэтээҕи офтальмологическай балыыһаҕа үс саастаах Лёша Степанов хараҕынан көрөр буолла. Уолчааҥҥа «төрүөҕүттэн катаракта» («врожденная катаракта») диэн диагноз туруорбуттар. Оҕо эбэтэ Анна Егорова кэпсииринэн, ити иннинэ кырачаан сиэнэ дьону саҥаларыттан эрэ билэрэ. Соторутааҕыта Лёша иккис хараҕар эпэрээссийэни ааста уонна уруһуйдаан саҕалаата.
«Урут Алёша млэдьи онно-манна иҥнэрэ, ааҥҥа кэтиллэрэ. Кулун тутарга уҥа хараҕар эпэрээссийэ оҥорбуттара, онтон ыла тута үчүгэйдик көрөр буолбута. Сиэним олус диэн үөрбүтэ, кини хайдах курдук соһуйбутун көрүөххүт этэ. Алёша сирэйбин уһуннук одуулаабыта — урут дьону куоластарыттан эрэ арааран билэрэ. Билигин, иккис эпэрээссийэ кэнниттэн, сиэним бэйэтэ өҥнүүр уонна уруһуйдуур буолла. Оҕолоро маннык ыарыыга ылларбыт төрөппүттэргэ куттамматтарыгар сүбэлиэм этэ. Оҕолор тустарыгар барытын оҥоруохха, итэҕэйиэххэ наада», — диэн кэпсиир Анна Егорова.
Катарактаны ылар эпэрээссийэни үрдүкү категориялаах быраас, Саха сирин Доруобуйа харыстабылын министиэристибэтин кылаабынай офтальмолога Екатерина Захарова оҥордо. Маннык эпэрээссийэҕэ тус оҥоһуу хрусталиктары сакаастыыллар, быраастар ону ыарыһах хараҕын кээмэйигэр сөп түбэһиннэрэн талаллар.
«Оҕолорго төрүөхтэриттэн баар катарактаны ылар эпэрээссийэни уопсай наркоһунан оҥороллор. Быраас харах бүрүөһүнүн кыратык быһар, ол нөҥүө туман буолбут сымнаҕас хрусталигы ылан баран, оҥоһуу линзаны туруорар. «Төрүөхтэн катаракта» диагноз оҕо төрүүрүгэр туруоруллар, ол эрээри ыарыы мэлдьи тута биллибэт. Эпэрээссийэ иннинэ кыра оҕо элбэх чинчийиини ааһар, эпэрээссийэҕэ бэлэм буолуохтаах. Бу түһүмэххэ оҥоһуу хрусталиктары суоттааһын ыытыллар. Саха сиригэр офтальмолог учуотугар 60-тан тахса оҕо турар», — диэн кэпсээтэ Саха сиринээҕи Өрөспүүбүлүкэтээҕи офтальмологическай балыыһа кылаабынай бырааһа Иван Луцкан.
Билигин Лёша туруга үчүгэй уонна балыыһаттан таҕыста. «Сиэммэр хараҕын көрөр оҥорбуттарын иһин быраастарга улахан махтал. Биһиги эмтэнэ Москваҕа көтөр кыахпыт суох этэ. Барыта олус түргэнник ааста, уһун уочараты күүтэр наадата суох буолла», — диэн этэр Анна Егорова. Бу туһунан Өрөспүүбүлүкэтээҕи офтальмологическай балыыһа пресс-сулууспата суруйар.