Саха сиригэр “Земскэй дуоктар”, “Земскэй биэлсэр” бырагыраамаларынан улуустарга эмчит идэлээх исписэлиистэри ыытыы салҕанар.
Быйыл мэдиссиинэ тэрилтэлэрэ 106 үлэһити: 73 бырааһы уонна 33 биэлсэри ылар былааннаахтар. Бүгүҥҥү күҥҥэ бырагыраама кыттыылаахтарын кытта 62 дуогабар түһэрсиллибит, ол иһигэр быраастары кытта — 39, биэлсэрдэри кытта — 23. Арассыыйа бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын чэрчитинэн исписэлиистэри тардар үлэ салҕанар.
2025 сыллаахха “Земскэй дуоктар”, “Земскэй биэлсэр” бырагыраамалар көмөтүнэн Саха сиригэр мэдисиинэ тэрилтэлэригэр 111 исписэлиис үлэлии кэлбитэ. Былааннаммыт миэстэ барыта туолбута, онон бырагыраама 100% көдьүүстээҕин көрдөрбүтэ.
«Маннык өйөбүл көмөтүнэн, доруобуйа харыстабылын каадыр өттүнэн кыаҕын күүһүртүбүт, ол иһигэр исписэлиис тиийбэт ыраах уонна суола-ииһэ суох сирдэрин кытта. 2026 сылга үлэ салҕанар: хайыы-үйэ 62 дуогабар түһэрсилиннэ, биһиги сыалбыт-сорукпут – доруобуйа харыстабылын былааннаммыт көрдөрүүтүн барытын толоруу уонна каадыр састаабын салгыы бөҕөргөтүү», — диэн бэлиэтээтэ доруобуйа харыстабылын миниистирэ Лена Афанасьева.
Өйөбүл сүрүн миэрэтинэн биирдэ бэриллэр төлөбүр хаалар. Тыа сирин нэһилиэнньэлээх пууннарыгар эбэтэр куораттыы тииптээх бөһүөлэктэргэ көһөр быраастарга 2 мөлүйүөн, оттон биэлсэрдэргэ 1 мөлүйүөн солкуобай бэриллэр. 50 тыһыынчаҕа диэри нэһилиэнньэлээх куораттарга үлэлиир исписэлиистэргэ — быраастарга 1 мөлүйүөн солкуобай, биэлсэрдэргэ 500 тыһыынча солкуобай төлөбүр көрүллэр. Исписэлиистэр бу үптэрин дьиэни, тырааныспары атыылаһыыга уонна саҥа сиргэ олохсуйалларынан атын да ороскуокка туһаныахтарын сөп.
СӨ Ил Дарханын уонна Бырабыыталыстыбатын пресс-сулууспата.