“Дьокуускайдааҕы ньиэп баазатын” филиалыгар АИ-95 бэнсиин атыытыгар, суһал сулууспаттан ураты бары туһанааччыларга, сууккатааҕы лимиити киллэрдилэр. Ити туһунан гражданскай оборуона уонна нэһилиэнньэ олоҕор-дьаһаҕар куттал суох буолууга миниистирин бастакы солбуйааччыта Айаал Вензель бүгүҥҥү брифинг кэмигэр иһитиннэрдэ.
“Баар уматыгы биир тэҥник үллэрэр уонна быстах кэмҥэ олус элбэх киһи ылбатын туһугар уматыгы атыылааһыҥҥа хааччахтааһын олохтонно” – диэн Айаал Вензель бэлиэтээбит.
2026 сыл атырдьах ыйын 13 күнүттэн “Дьокуускайдааҕы ньиэп баазатын” филиалыгар, суһал сулууспаттан ураты туһанааччыларга, АИ-95 бэнсииҥҥэ сууккатааҕы лимиит олохтоммут. Биирдиилээн сапыраапкалыыр ыстаансыйаларга харчынан уонна каартанан төлөбүргэ АИ-92 бэнсиин атыыта быстах кэмҥэ тохтоото. Маныаха үгүс АЗС, ол иһигэр Сиинэ сэлиэнньэтин ыстаансыйата эрэсиим быһыытынан үлэлииллэр.
“Билигин Саха сиригэр эбии ньиэп бородууксуйата кэлэн иһэр. Ол кэллэҕинэ билигин баар лимиити хаттаан көрүөхпүт” – диэн кини эппит.
Айаал Вензель иһитиннэрбитинэн, 2026 сылга уу суолунан хотугу таһаҕаһы тиэйии кыраапык быһыытынан барар. Арктика уонна хотугу улуустарга ньиэп бородууксуйатын, чоҕу уонна олоххо суолталаах таһаҕаһы таһыы былааннаах эрэсиим быһыытынан ыытыллар. Бу туһунан Ил Дархан уонна Бырабыыталыстыба пресс-сулууспата суруйар. Сиһилии манна ааҕыҥ.