Арктикатааҕы судаарыстыбаннай агротехнология университетын Өктөмнөөҕү филиалын баазатыгар тыа хаһаайыстыбатыгар аналлаах DJI Agras T10 дрон үлэтин көрдөрдүлэр. Бу үрдүк технологиялаах тиэхиньикэни РФ Тыатын хаһаайыстыбатын министиэристибэтин сакааһынан, стандартнайа суох сүөһү аһылыгын үүннэрэр бырагыраама чэрчитинэн атыыласпыттар.
Хонууга тургутуу кэмигэр пилота суох аппараат биир гектар иэннээх помидор үүнэр сиригэр уоҕурдууну ситиһиилээхтик ыста. Маннык аппарааттар сүрүн соруктара — үүнээйини пестицидынан ыһыы уонна эбии аһатыы үлэтин аптамааттааһын буолар. Бу тыа хаһаайыстыбатын үлэтин көдьүүһүн биллэрдик үрдэтэр.
АГАТУ Өктөмнөөҕү филиалын тыа хаһаайыстыбатын механизациялыыр кафедратын старшай преподавателэ Михаил Шадрин маннык технологиялары хотугу эрэгийиэҥҥэ киллэрии суолтатын бэлиэтээтэ.
«Биһиги сүрүн сыалбыт — дроннары туһаныы аныгы муода эрэ буолбакка, Саха сирин тыатын хаһаайыстыбатыгар экэниэмикэ өттүнэн барыстаах уонна үрдүк көдьүүстээх үлэ сэбэ буоларын дьыалатыгар дакаастааһын. Биһиги номнуо ситиһиилээх уопуттаахпыт: быйыл Чурапчы улууһугар маннык үлэни ыыппыппыт, сарсын онно түмүгү кэтээн көрө үһүстээн барыахпыт», — диэн эттэ Михаил Шадрин.
Кини этэринэн, агродроннары туһаныы идэтийбит бэлэми эрэйэр. Маннык кылаастаах (көтөрүгэр ыйааһына 30 кг диэри) тиэхиньикэни салайарга оператор анал үөрэҕи ааһыахтаах. Онон сибээстээн, АГАТУ салалтата инникитин аныгы агротехнологиялары кытта үлэлиир кыахтаах квалификациялаах каадырдары бэлэмниир туһуттан, үөрэх бырагырааматыгар анал дьиссипилиинэлэри киллэрэри былаанныыр. Бу уопуту салгыы тарҕатыы олохтоох аграрийдарга өрөспүүбүлүкэ уустук килиимэтигэр даҕаны ороскуоту намтатарга уонна үүнүүнү үрдэтэргэ көмөлөһүө диэн күүтүллэр.