Хаҥаласка Покровскай куорат маастар-былаанын оҥоруу салҕанар.
Былааҥҥа инфраструктураны, социальнай эбийиэктэри тупсарыы уонна 2029 сылга буолуохтаах суолталаах тэрээһиннэргэ, ол иһигэр XXIII Манчаары оонньууларыгар бэлэмнэнии киирэллэр.
«Архитектордар болҕомтолорун Покровскайга уураллар, 2029 сылга XXIII Манчаары оонньууларын киин куоратынан буолуоҕа. Стратегическай докумуон куорат сайдыытын үйэлэр усталарыгар быһаарыаҕа: маастар-былаан чэрчитинэн стадион, физкултуурунай-чэбдигирдэр комплекс уонна 550 миэстэлээх аныгы оскуола тутуллуохтара. Балар тула уопсастыбаннай эйгэ ситимэ үөскүүр, инвестиционнай бырайыактар баар буолаллар, Хаҥалас улууһун бүтүн туристическай куода саҥардыллар. Бу — систиэмэлээх сыһыан дьайыыта: биир докумуон уонунан быһаарыыны торумнуур уонна тыһыынчанан киһи олоҕун хаачыстыбатын уларытар», — диэтэ Саха сирин сүрүн архитектора Любовь Папок.
Кини этэринэн, саҥа бырайыактар төрдүлэригэр Таатта улууһугар 2025 сылга ыытыллыбыт Манчаары оонньууларыгар тиһиктээхтик бэлэмнээбит уопуттара турар. Ол онно систиэмэлээх сыһыан көмөтүнэн социальнай, спортивнай уонна инфраструктурнай эбийиэктэр тутуллубуттара, ол иһигэр Тааттатааҕы лиссиэй, А.Е. Турнин аатынан успуорт комплекса, 1000 миэстэлээх «Ньургун Боотур» стадион, аныгы поликлиника, ипподром, ону тэҥэ суол-иис, киирии бэлиэлэр, муосталар, паарка, Ытык Күөл күөлүн кытылын тупсарыы уонна Чөркөөх мусуойа саҥардыллыбыттара. «Уопсастыбаннай эйгэни тупсарыы — бу бастатан туран, дьоҥҥо табыгастаах эйгэни тэрийии. Арассыыйа Федерациятын Бэрэсидьиэнэ Владимир Путин сорудаҕынан Саха сиригэр территориялары сайыннарыыга тиһиктээх бырайыактар олоххо киирэллэр».