Дьокуускайга 180 гектартан тахса сир-уот тупсарыллыаҕа. Бу куораты сайыннарыы уһун болдьохтоох былаанын олоххо киллэрии чэрчитинэн ыытыллар.
Былаан 2032 сылга бэлиэтэнэр Дьокуускай 400 сылыгар бэлэмнэниигэ туһуланар.
—Маастар-былааны олоххо киллэрии 2032 сылга куорат олох хаачыстыбатынан үрдүк таһымнаах буоларыгар бигэ тирэҕи тэрийэр. Дьокуускай төрүттэммитэ 400 сылын бэлиэтиир туһунан 2025 сыллаахха муус устарга РФ Бэрэсидьиэнин ыйааҕа тахсыбыта, — диэн этэр Ил Дархан Айсен Николаев.
Саха сирин киин куоратын маастар-былаанын чэрчитинэн Өлүөнэ муостатын, «Звезднай» уонна «Спортивнай» саҥа олорор түөлбэлэри, музыка үрдүкү оскуолатын, ону таһынан оскуолалары уонна уһуйааннары тутуу ыытыллар. 2026 сыллаахха 1 №-дээх оскуоланы уонна Арктикатааҕы эпос уонна ускуустуба киинин үлэҕэ киллэрии былааннанар.
—Уопсастыбаннай сирдэри тупсарыы — бастатан туран, дьоҥҥо-сэргэҕэ табыгастаах эйгэни тэрийии. РФ Бэрэсидьиэнэ Владимир Владимирович Путин сорудаҕынан Саха сиригэр территориялары кэлимник сайыннарыы бырайыактара утумнаахтык олоххо киирэллэр. «Инфраструктура для жизни» национальнай бырайыак чэрчитинэн 2025 сылга өрөспүүбүлүкэ оройуоннааҕы кииннэригэр уонна сэлиэнньэлэригэр 24 маастар-былаан бэлэмнэммитэ, онтон 2026 сылга өссө икки — Покровскайга уонна Кыһыл Сыырга. Билигин номнуо түмүгү көрөбүт: тирэх нэһилиэнньэлээх пууннарга олох хаачыстыбата 2025 сыл түмүгүнэн 31,8% үрдээбит, бу 2019 сылы кытта тэҥнээтэххэ. Аныгы уопсастыбаннай сирдэр, саҥардыллыбыт инфраструктура уонна тупсаҕай куорат эйгэтэ куораттарга эрэ буолбакка, нэһилиэктэргэ уонна саамай ыраах сирдэргэ ордук улахан суолталаахтар, — диэн Судаарыстыбаннай Дуума дьокутаата Галина Данчикова бэлиэтиир.
РФ Бэрэсидьиэнин сорудаҕынан Саха сиригэр икки бөдөҥ куорат — Дьокуускай уонна Нерюнгри маастар-былааннара олоххо киирэллэр. Бу куораттар сайдыыларын кэлим былааннарыгар 116 тэрээһин киллэриллибитэ, онтон 78 — Дьокуускайга уонна 38 —Нерюнгри куоракка.
Сиһилии: https://www.sakha.gov.ru/news/59728
СӨ Ил Дарханын уонна Бырабыыталыстыбатын пресс-сулууспата