Арассыыйа Үөрэҕириитин министиэристибэтэ «Биир ньыгыл Арассыыйа» баартыйаны кытта бииргэ олоххо киллэрэр «Үөрэхтээһин тиһигин саҥардыы» федеральнай бырагыраама чэрчитинэн, 2025 сылга Уус-Алдан улууһун Бэйдиҥэ сэлиэнньэтигэр А.Н. Жирков аатынан Бэйдиҥэтээҕи орто оскуола хапытаалынай өрөмүөнэ ыытыллыбыта.
Улахан кээмэйдээх үлэлэр түмүктэринэн, үөрэх тэрилтэтин инфраструктуратын толору саҥардыы барда. Оскуола мультимедийнай оборудованиелаах уонна саҥа миэбэллээх аныгы үөрэнэр кылаастарынан, ону тэҥэ киэҥ-куоҥ, сырдык көрүдүөрдэринэн уонна аактабай саалалардаах буолла. Бу оскуола тас эрэ өттүн өрөмүөннээһин буолбатах, бүтүн инфраструктураны саҥардыы буолла. Тутааччылар инженернэй ситимнэри уларыттылар, дьиэ үрдүн уонна тас эркинин саҥартылар, акылаатын бөҕөргөттүлэр. Куттал суох буолуутун ирдэбиллэригэр ураты болҕомто уурулунна: баһаарынай сигнализацияны, видеонан кэтээн көрүү систиэмэтин уонна киириини-тахсыыны хонтуруоллуур тэриллэри туруордулар.
«Биһиги бу өрөмүөнү өр да кэтэспиппит, — диэн оскуола үлэһиттэрэ санааларын үллэстэллэр. — Оҕо үөрэнэрин, учуутал айымньылаахтык үлэлиирин көҕүлүүр эйгэ тэрилиннэ. Биһиги оҕолорбут инники кэскиллэригэр сүҥкэн кылаат буолар».
Онтон оскуола оҕолоро, эмиэ үөрүүлэрин кистээбэттэр. Кинилэр этэллэринэн, саҥа оскуолаҕа үөрэ-көтө тиийбиттэр. Саҥа кылаастар аныгы коворкинг-кииннэри санаттахтара, манна билиини эрэ буолбакка, бэйэ бырайыактарын олоххо киллэриэххэ сөп.