Ааспыт өрөбүллэргэ Ис дьыалаҕа министиэристибэтэ үтүө үгэскэ кубулуйбут чэбдигирдэр сынньалаҥы тэрийдэ.
Бу сынньалаҥ иэстэрин толоро сылдьан олохторун толук уурбут үлэһиттэр шефствоҕа ылыллыбыт дьиэ кэргэттэригэр, ону тэҥэ сулууспа кэмигэр уонна байыаннай сорудахтары толорууга эчэйэн инбэлиит буолбут бииргэ үлэлиир дьонноругар ананна. Доруобуйаны бөҕөргөтүүгэ, уйылҕаны чэпчэтиигэ уонна кыттааччылары түмүүгэ туһаайыллыбыт тэрээһин Хаҥалас улууһугар баар «Сосновый бор» сынньалаҥ баазатыгар буолан ааста.
Икки күн устата ыалдьыттарга анаан бытархайга тиийэ толкуйдаммыт, ис хоһоонноох бырагыраама бэлэмнэммитэ. Тэрийээччилэр дьон уйулҕатын чэпчэтиигэ уонна өйөөһүҥҥэ ураты болҕомтону уурдулар. ИДьМ психологтара тус бэйэ уонна дьиэ кэргэн боппуруостарыгар хас биирдии киһини кытта туспа консультациялары, ону тэҥэ дьону түмэргэ аналлаах трениннэри ыыттылар. Олохторун толук уурбут полицейскайдар ойохторун, төрөппүттэрин уонна инбэлиит буолбут үлэһиттэри моральнай өттүнэн өйүүр сыалтан ИДьМ Үлэһиттэри кытта үлэлиир салаа салайааччыта, полиция полковнига Сардана Кисанаева тус бэйэтинэн көрүстэ уонна кэпсэттэ.
«Динамо» Саха сиринээҕи өрөспүүбүлүкэтээҕи сэбиэтин өйөбүлүнэн ыытыллыбыт тэрээһиннэр дьоҥҥо сэргэх сынньалаҥы уонна күрэхтэһии тыынын бэлэхтээтилэр. Оҕолорго уонна улахан дьоҥҥо сулууспаҕа сыһыаннаах, маассабай уонна национальнай успуорт көрүҥнэригэр күрэхтэһиилэр тэрилиннилэр. Бары кыттааччылар кырааматаларынан, мэтээллэринэн, значоктарынан уонна бэлэхтэринэн наҕараадаланнылар.
Саамай кыра саастаах ыалдьыттарга анаан саастарын ситэ илик оҕолор дьыалаларыгар иниспиэктэрдэр психологтары кытта чаҕылхай көстүүмнээх оонньуу бырагырааматын бэлэмнээбиттэрэ, оҕолорго үөрүүнү-көтүүнү уонна мичээри бэлэхтээтэ.
Саха сиринээҕи ИДьМ Култууратын киинэ сынньанааччыларга анаан кэнсиэр бэлэмнээтэ. Манна биэдэмистибэ «Служба 02» ансаамбыла уонна өрөспүүбүлүкэ Судаарыстыбаннай опера уонна балет тыйаатырын хорун солиһа Василий Пинигин кытыннылар.
Өрөбүл күннэр үөрүүлээх түгэнинэн түмүктэннилэр: «Совкомбанк» ПАО кытта бииргэ үлэлээһин түмүгэр олохторун толук уурбут үлэһиттэр ойохторугар, төрөппүттэригэр уонна инбэлиит буолбут бииргэ үлэлиир дьонноругар өйдөбүнньүк бэлэхтэр туттарылыннылар.