Бүгүн «Боотур» добровольческай этэрээтин байыастарын 41-с састаабын анал байыаннай дьайыыга атаарар тэрээһин буолан ааста.
Сорох буойуттар байыаннай дьайыы зонатыгар иккис уонна үһүс төгүлүн бараллар. Бу кинилэр бойобуой доҕотторун иннилэригэр толуйуллубатах иэстээхтэрин уонна сорудаҕы тиһэҕэр тиийэ толорор баҕалаахтарын көрдөрөр. Биһиги буойуттарбыт мэлдьи үчүгэй бэлэмнээхтэрин көрдөрөллөр – манна «Боотур» үөрэтэр киин өҥөтө улахан, уолаттар бойобуой бэлэми ааһаллар уонна сатабыллары ылаллар.
Уон сэттэ саха уола «Боотур» диэн баҕа өттүнэн кыттааччылар саҥа этэрээттэригэр киирэн, байыаннай дьайыы зонатыгар бараллар. Бу уолаттарга бойобуой суолу ааспыт дьонтон алгыс тылларын истии ордук суолталаах. Алгыс тылы эппит дьон бары уолаттары харыстана сылдьалларыгар, тыыннаах уонна доруобай эргиллэн кэлэллэригэр баҕардылар.
«Билигин олох уустук, олус суолталаах кэм. Эһиги быһаарыныы ылынан Ийэ дойдубут бу ыарахан кэмигэр, дойдуну көмүскүү баран эрэҕит. Биллэн турар, билигин байыастар, боотурдар наадалар, ону тэҥэ Саха сирин боотурдара эһигини күүтэллэр. Эһиэхэ хас биирдиигитигэр алгыс тыллара этилиннилэр – доруобай сылдьаргытыгар, этэҥҥэ эргиллэргитигэр баҕарабын. Эһигини кытта биһиги баарбыт. Дойдугут эһигинэн киэн туттар!», — диэн эттэ байыаннай дьайыы кыттыылааҕа, СӨ ыччат дьыалаларыгар миниистирэ Петр Шамаев
«Эһиги байыаннай дьайыы зонатыгар тиийдэххитинэ ууну-уоту ортотунан ааспыт эрэллээх уолаттар тирэх буолуохтара. Улахан уопуттаах уолаттар, кинилэри кытары мин эмиэ барсыбытым. Биһиги бойобуой сорудахтары толорбуппут. Онно саамай сүрүнэ – дьиссипилиинэ. Аармыйаҕа барыта дьиссипилиинэттэн тутулуктаах. Кыайыыны хайдахтаах да түгэҥҥэ дьиссипилиинэ эрэ көмөтүнэн ситиһиэххэ сөп. Отделениелар хамандыырдара баар буолуохтара, эдэрчи уолаттар курдук көстүөхтэрэ, ол эрэн көрүҥнэригэр, саастарыгар болҕомтоҕутун уурумаҥ, киһини уопутун иһин ытыктыахха наада. Араас сыыһа-халты быһыылары таһаарымаҥ. Эһиги билигин саамай итии кэмҥэ баран эрэҕит, араас ыарахаттары көрсүөххүт, ону барытын тулуйаргытыгар баҕарабын», — диэтэ байыаннай дьайыы бэтэрээнэ Василий Местников.
Этэрээти атаара байыаннай дьайыылар кыттыылаахтара, бэтэрээннэрэ, волонтердар уонна буойуттар аймахтара кэлэн кытыннылар.
