Үрдүк ыйааһынтан уонна уойууттан сылтаан дьон эрдэ өлөрө дойду экэниэмикэтигэр 0,7 %-гар тиийэ ночооту аҕалыан сөп. Бу туһунан Экэниэмикэ үрдүкү оскуолатын (НИУ ВШЭ) бэрэпиэссэрэ Марина Колосницына уонна кини аспирана Анастасия Деева оҥорбут чинчийиилэригэр этиллэр.
Экэниэмиэҕэ охсуута — 1,25 триллион солкуобай
РБК таһаарбыт дааннайдарыгар олоҕурдахха, уойуу кыһалҕата дойдуга сүүнэ улахан харчы ороскуотун таһаарар. «2023 сылга аһара уойууттан эрдэ өлбүт дьон олоруохтаах кэмнэрин устатыгар оҥоруохтаах бородуукталарын уонна өҥөлөрүн уопсай суумата 1,25 триллион солкуобайга тиийэр», — диэн учуонайдар бэлиэтииллэр. Ол аата, дойду дьон үлэлээн-хамсаан оҥоруохтаах барыһын сүтэрэр.
Чинчийээччилэр итинник түмүккэ кэлэллэригэр, Росстат демография уонна үлэ ырыынагын туругун көрдөрөр дааннайдарын сиһилии ырыппыттар. Ону таһынан 2023 сыллааҕы ВВП көрдөрүүтүн уонна кэлэр өттүгэр сабаҕалааһыннары учуоттаабыттар.
Нэһилиэнньэ 60 %-на нуорманы куоһарар ыйааһыннаах
MK.RU хаһыат бэлиэтииринэн, Арассыыйаҕа уойуу кыһалҕата киэҥ далааһыннаах. Ити доруобуйа харыстабылын тиһигэр эрэ буолбакка, дойду уопсай экэниэмикэтигэр улахан кыһалҕаны үөскэтэр. Билиҥҥи туругунан, Арассыыйа олохтоохторуттан 60 % кэриҥэтин этин-сиинин ыйааһына доруобай киһи нуорматын куоһарар.