Амма улууһун Майскай нэһилиэгэр, Амма өрүс күнүгэр “Арассыыйа уута” Бүтүн Арассыыйатааҕы аахсыйа чэрчитинэн киэҥ далааһыннаах экология субуотунньуга саҕаланна. Амма, Чурапчы, Таатта уонна Алдан улууһун сүүһүнэн олохтоохторо өрүс кытылын ыраастааһыҥҥа бэйэлэрин кылааттарын киллэрдилэр диэн “Амма олоҕо” хаһыат суруйар.
Тэрээһиҥҥэ Саха сирин бырабыыталыстыбатын бэрэссэдээтэлин солбуйааччы Ольга Балабкина, экология, айылҕаны туһаныы уонна ойуур хаһаайыстыбатын миниистирэ Евгений Перфильев, Амма улууһун баһылыга Степан Кузьмин, Покровка сэлиэнньэтин олохтоохторо, ыалдьыттара кытыннылар. Бүтүн Арассыыйатааҕы “Арассыыйа уута” аахсыйа дойду Бэрэсидьиэнэ Владимир Путин көҕүлээһининэн олоххо киирбит “Экологическай үтүө турук” национальнай бырайыак “Ыраас уу” федеральнай бырайыагын иитинэн ыытыллар. Саха сиригэр аахсыйа Ил Дархан Айсен Николаев “СӨ экологическай үтүө туругун туһунан” стратегическай Ыйааҕыгар сөп түбэһэн тэриллэр. Эрэгийиэн ууга эбийиэктэригэр экологическай субуотунньуктар алтынньы 31 күнүгэр диэри ыытыллыахтара.
“Экологическай волонтерство Саха сирин ыччатын олоҕун быстыспат сорҕотунан буолла. Төрөөбүт өрөспүүбүлүкэтин айылҕатын харыстыыр туһугар ыччат көхтөөхтүк түмсэрин министиэристибэ бэлиэтиир. Волонтердар субуотунньукка кытталлар, өрүс кытылларын ыраастыыллар, экологияҕа сыһыаннаах көҕүлээһиннэрин олоххо киллэрэллэр, бэйэлэрин хамсааһыннарынан атыттарга холобур буолаллар. Бу курдук көхтөөх гражданскай кирбии түмүгэр, былырыын 50 тыһ. тахса олохтоох кытылы ыраастааһыҥҥа кыттыбыта, Саха сирэ “Арассыыйа уута” аахсыйа түмүгүнэн дойдуга уон бастыҥ эрэгийиэн кэккэтигэр киирбитэ” – диэн СӨ ыччат дьыалаларын уонна социальнай коммуникациялар миниистирэ Петр Шамаев бэлиэтиир.
Амма улууһугар ыытыллыбыт экология аахсыйатыгар кыттан олохтоохтор, волонтердар, ыалдьыттар өрүс кытылын ыраастаатылар, эстафетаны салгыы биэрдилэр. Аахсыйа кыттыылаахтарыгар анаан экологическай сырдатар эстафета буолла. “Бастакы ыстаансыйаҕа кыттааччылары каравайынан күндүлээтилэр, Дьэргэстэй кыыс уонна тапталлаах Омоллоон туһунан номоҕу кэпсээтилэр. Экология министиэристибэтин исписэлиистэрэ Амма өрүс туһунан сэргэх викторинаны ыыттылар. Баҕа санаа куонкуруһун тэрийдилэр, манна ким баҕалаах барыта өрүскэ сыһыаннаах киһини долгутар баҕа санаатын суруйда. Төрдүс ыстаансыйаҕа биһигини эдэр блогер, Болугур сэлиэнньэтиттэн төрүттээх, оҕо саас уонна Амматааҕы дьоллоох оҕо саас амбассадора Айыына Кожурова күүтэн олороро. Кини ыалдьыттары Амма туһунан ырыанан көрүстэ, сайынын эһэлээх эбэтигэр кэллэҕинэ сөтүөлүүрүн сөбүлүүрүн туһунан кэпсээтэ” – диэн Покровка сэлиэнньэтин олохтооҕо Диана Павлова бэйэтин санаатын үллэһиннэ. Бу туһунан Ил Дархан уонна Бырабыыталыстыба пресс-сулууспата сырдатар.