Арассыыйа Бэрэсидьиэнэ Владимир Путин Кириэмилгэ Саха Өрөспүүбүлүкэтин баһылыга Айсен Николаевы кытта көрүстэ. Көрсүһүүгэ эрэгийиэн социальнай-экэнэмиичэскэй сайдыытын сүрүн боппуруостара, төрөөһүнү өйүүр миэрэлэр уонна инфраструктура бырайыактара олоххо киириилэрэ дьүүллэһилиннилэр.
Кэпсэтии сүрүн тиэмэлэринэн – социальнай-экэнэмиичэскэй сайдыы: Айсен Николаев өрөспүүбүлүкэ экэниэмикэтэ бигэ туруктаахтык сайдарын уонна демографияны өйүүр миэрэлэр тустарынан иһитиннэрдэ. Байыаннай дьайыы кыттыылаахтарыгар уонна кинилэр дьиэ кэргэттэригэр көмөнү оҥорууга ураты болҕомто уурулунна. Бэрэсидьиэн ыараханнык бааһырбыт байыастарга уонна кинилэр дьиэ кэргэттэригэр хаачыстыбалаах көмөнү оҥоруу суолтатын тоһоҕолоон бэлиэтээтэ.
Бырамыысыланнаска уонна сир баайын хостооһуҥҥа ситиһиилэри, Саха сирин баһылыга алмаас хостуур «АЛРОСА» хампаанньа аан дойдуга соҕотох барыстаахтык үлэлиир алмааһы хостуур тэрилтэ буоларын, ону таһынан, былырыын уустуктары аахсыбакка барыһы ылбытын эттэ. Саха сирэ үрүҥ көмүһү (586 туонна) хостооһуҥҥа Арассыыйаҕа бастакы миэстэҕэ таҕыста, кыһыл көмүскэ иккис (56,5 туонна), чоххо эмиэ иккис (51 мөлүйүөн туонна), ньиэпкэ уонна гааска биэс бастыҥ иһигэр киирэр диэн эрэгийиэн баһылагы кэпсээтэ.
Инфраструктура бырайыактарын туһунан, «Эльгауголь» хампаанньа Чуумпу акыйааннааҕы тимир суолун бырайыага олоххо киирэн, таһаҕаһы таһыы кыамтата сылга 30 мөлүйүөн туоннаҕа тиийбитин туһунан кэпсэттилэр. Ону таһынан, Арктикаҕа аналлаах «Синергия Арктики» диэн 11 миллиард солкуобай суумалаах саамай улахан телекоммуникационнай бырайыак саҕаламмыта этилиннэ. Бу бырайыак 61 арктическай бөһүөлэги оптоволокно ситиминэн холбуоҕа, Чукотканы уонна Хотугу муора суолун кытта ситимниэҕэ.
Айсен Николаев үс сыл иһигэр киллэриллэр 2 гигаватт кыамталаах энергетика эбийиэктэрэ тутулла туралларын иһитиннэрдэ. Новоленскай ГРЭС («Интер РАО»), Нерюнгритааҕы ГРЭС иккис уочарата уонна Дьокуускайдааҕы ГРЭС-2 иккис уочарата тутуллаллар. Ол эрэн, тарыыптар үрдүктэринэн уонна Уһук Илин энэргиэтикэтин систиэмэтин өйөөһүн наадатынан, кэккэ ыарахаттар баалларын бэлиэтээтэ.
Владимир Путин Саха сирин экэниэмикэтигэр инвестиция кээмэйэ кыратык түспүтүн бэлиэтээтэ. Айсен Николаев бу көстүүнү «Сибиир күүһэ» гаас ситимин тутуу түмүктэммитинэн быһаарда. Инвестиция кээмэйэ муҥутаан 795 млрд солк. тиийэ сылдьыбыт буоллаҕына, билигин 780 млрд солк. таһымыгар баар, ол да буоллар бүддьүөт туолуута бигэ.
Көрсүһүү түмүгэр Айсен Николаев Бэрэсидьиэҥҥэ байыаннай дьайыы кыттыылаахтарын ааттарыттан саха быһаҕын бэлэхтээтэ. Быһахха «Үрдүкү Главнокомандующайга саха буойуттарыттан» диэн суруктаах. Онуоха Бэрэсидьиэн махталын биллэрдэ.