Ил Дархан Айсен Николаев РФ Бэрэсидьиэнэ Владимир Путины кытта көрсүһүүтүгэр байыаннай дьайыы кыттыылаахтарын уонна кинилэр дьиэ кэргэттэрин өйөөһүн туһунан кэпсээтэ.
Кини бүгүн өрөспүүбүлүкэҕэ 117 өйөбүл араас дьаһаллара үлэлииллэрин, ону тэҥэ «Саха сирэ – дьоруойдар дойдулара» каадыр бырагыраамата үлэлиирин бэлиэтээн эттэ. Судаарыстыба баһылыга байыаннай сулууспалаахтарга уонна кинилэр дьиэ кэргэттэригэр өйөбүлү оҥоруу үлэтин салгыырга сорудахтаата. Бу туһунан Улус Медиа сурулунна.
Байыаннай дьайыы бэтэрээнэ Михаил Копырин «Саха сирэ — дьоруойдар дойдулара» каадыр бырагырааматын выпускнига. Соторутааҕыта кини СӨ бырамыысыланнаска уонна геологияҕа миниистири солбуйааччынан ананна. Михаил Копырин Саха сирэ байыастарга улахан өйөбүлү оҥорорун бэлиэтиир. Кини бэйэтэ байыаннай дьайыыга кыттыбыт буолан, чахчы гуманитарнай да көмө, тиэхиньикэ да өттүнэн көмө оҥоһулларын бэлиэтиир.
—Бааһыран эмтэнэ диэн Москваҕа баран истэхпинэ, миэхэ Саха сириттэн волонтердар сибээскэ тахсыбыттара. Госпитальга эмтэнэр кэммэр кинилэр тиһиктээхтик көмөлөспүттэрэ. Уопсайынан, биһиги өрөспүүбүлүкэбитигэр байыаннай сулууспалаахтарга уонна кинилэр дьиэ кэргэттэригэр өйөбүл дьаһаллара олус элбэх – оптуобуһунан босхо айаннааһынтан саҕалаан, — диир Михаил Копырин.
Миниистир саҥа солбуйааччыта «Саха сирэ — дьоруойдар дойдулара» каадыр бырагырааматын бэлиэтиир:
—Бу бырагыраама кыттыылааҕа буоларбыттан үөрэбин. Сүүмэрдээһин кытаанах этэ — биһиги бастаан 600 этибит. Онтон 25 киһини ылбыттара. Бырагыраама үчүгэй, теорияны үөрэппиппит, стажировкаламмыппыт. Саамай кылаабынайа, биһиги лектордарбыт үлэлии сылдьар салайааччылар – миниистирдэр, оройуоннар баһылыктара, уо.д. а. Биһигини туохха барытыгар үөрэттилэр, киэҥ, улахан билиини-көрүүнү ыллым, ол бэйэм сайдарбар кыаҕы биэрдэ. Ону таһынан, Ил Дархан Айсен Николаев тус бэйэтэ эмиэ биһиги бырагыраамабытыгар болҕомтотун уурбута: хаста да кэлэн биһигини кытта алтыспыта, кэпсэппитэ. Бу, мин санаабар, кини биһиэхэ уонна байыаннай дьайыы кыттыылаахтарыгар өрөспүүбүлүкэ сайдыытын туһугар салайар үлэлэргэ үлэлэтэргэ болҕомтотун уурарын көрдөрөр.
Михаил Копырин түмүккэ бары байыаннай сулууспалаахтар дьиэлэригэр этэҥҥэ эргиллэн кэлэллэригэр, онтон кинилэр дьиэ кэргэттэрэ тулуурдаах уонна эрэллээх буолалларыгар баҕарда.
Екатерина Гладкина, Улус Медиаттан.
Хаартыска: Михаил Копырин тиксэриитэ