Бүгүн Мэҥэ Хаҥалас улууһун Догдоҥо нэһилиэгин ытык сиригэр – Тураахтаах эбэтигэр «ХОДУҺА ХОҺУУТТАРА» илии хотуурунан от охсууга өрөспүүбүлүкэтээҕи күүлэй буолла.
Бу күн кыттааччылар уонна ыалдьыттар илии хотуурунан от охсууга эрэ күрэхтэспэтилэр. Ол курдук маастар-кылаастар, быыстапкалар, эҕэрдэ-кэнсиэр тэрилиннилэр.
Киин тэрээһиннэртэн биирдэстэринэн от охсууга күрэхтэһии буолла, манна уопуттаах от охсооччулар, эдэр ыччат уонна оҕолор кытыннылар. Саха Өрөспүүбүлүкэтин ыччат дьыалаларыгар уонна социальнай коммуникацияларга миниистирэ Петр Шамаев күрэхтэһии кыттыылаахтарын кытта окко таҕыста.
«Илиинэн оттооһун — дьиҥнээх маастарыстыбаны, күүһү, тулууру эрэйэр. Маннык үгэстэр тыыннаах хаалан, эдэр көлүөнэҕэ бэриллэн иһиэхтээхтэр», — диэн ыччат миниистирэ Петр Шамаев бэлиэтээн эттэ.
Петр Шамаевка бу күрэхтэһии ураты суолталаах. Кини тыа сиригэр улааппыт буолан кыра эрдэҕиттэн тыа хаһаайыстыбатын үлэтин-хамнаһын билэр.
«Оҕо сааспын, тыа сирин санаан кэллим: эрдэ туруу, сибиэһэй охсуллубут от сыта, хотуур тыаһа. Оччолорго бэйэм убайдарбыныын окко сылдьыбытым, оттон билигин бу үгэһи уолум салгыыр», — диэн миниистир эбэн эттэ.
Санатан эттэххэ, «Ходуһа хоһууттара» күүлэй дойду үрдүнэн Сомоҕолоһуу, Саха сиригэр Култуура, Мэҥэ Хаҥалас улууһугар Олохтоох бэйэ оҥорон таһаарыы сылларыгар, “Урожай” спортивнай уопсастыба тэриллибитэ 75 сылыгар анаан ыытылынна.
Аан бастаан улуустааҕы күүлэй күрэхтэһиитин 1975 сыллаахха Мэҥэ Хаҥалас улууһун идэлээх сойуустара Баатара нэһилиэгэр тэрийбиттэрэ.