Бэҕэһээ Дьокуускайдааҕы 4-с нүөмэрдээх полиция салаатын дьуһуурунай чааһыгар эр киһи кэлэн, соҕотох олорор билэр киһитэ хаһыс даҕаны күнүн сибээскэ тахсыбатын, төлөпүөнүн ылбатын туһунан иһитиннэрбит.
Полиция боломуочуйалаах участковайа полиция старшай лейтенана, тустаах сири хааччыйар Кюнней Алексеева тус бэйэтинэн баран иһитиннэриини бэрэбиэркэлииргэ быһаарынар.
“Ыйыллыбыт аадырыска тиийбитэ, кыбартыыра хатыылаах, иһирдьэттэн сытыы, соччото суох сыт кэлэр эбит. Балаһыанньаны үөрэтэн көрөн баран, тута быыһааччылары ыҥырбыт, кэлэн ааны арыйарга көмөлөспүттэр. Кыбартыыра иһигэр полиция старшай лейтенана сыттыкка хамсаабакка умса сытар эр киһини булбут. Тыыннааҕа биллибэт эбит: тыынара олус мөлтөх, сүрэҕин тэбиитэ нэһиилэ биллэр. Полиция үлэһитэ тута тыынарыгар мэһэйдиир сыттыгы ылбыт уонна мэдиссиинэ суһал көмөтүн ыҥырбыт.
Кэлин миэдиктэр иһитиннэрбиттэринэн, эр киһи инсуллаабыт уонна көмө ыҥырар кыаҕа суох буолан алта күн устата кыбартыыратыгар соҕотоҕун сыппыт.
Полиция боломуочуйалаах участковайа кэмигэр уонна быһаарыылаах дьаһаллары ылыытын түмүгэр, алдьархай тахсыбатах” – диэн ИДьМ Дьокуускайдааҕы пресс-сулууспата иһитиннэрэр.
Санатан эттэххэ, полиция старшай лейтенана Кюнней Алексеева быйыл ИДьМ “Норуот участковайа” Бүтүн Арассыыйатааҕы күөн күрэс бастакы түһүмэҕэр кыттар. Куоластааһын Саха сиринээҕи ИДьМ саайтыгар барар.