Саха сирин Ил Дархана Айсен Николаев Арассыыйа Бэрэсидьиэнин Владимир Путины кытта үлэнэн көрсүһүүтүгэр өрөспүүбүлүкэҕэ федеральнай суолталаах бөдөҥ инфраструктура бырайыактара хайдах олоххо киирэн эрэллэрин туһунан далакылааттаата. Ол иһигэр Чуумпу акыйааннааҕы тимир суол, «Арктика синергията» бырайыак уонна Өлүөнэ муостатын тутуута кэпсэннилэр.
Айсен Николаев «Эльга» хампаанньа туппут Чуумпу акыйааннааҕы тимир суола үлэҕэ киирэн, сылга 30 мөлүйүөн туоннаҕа диэри чоҕу аһарар кыахтаммытын иһитиннэрдэ. Кини этэринэн, бүгүҥҥү күҥҥэ Эльгинскэй сир баайа аан дойдуга биир саамай бөдөҥ чох бырайыага буолар.
Ил Дархан өрөспүүбүлүкэ ааспыт сыл сэтинньитигэр старт ылбыт «Арктика синергията» бырайыагын туһунан туспа тохтоон кэпсээтэ. Бырайыак Арктика 61 нэһилиэнньэлээх пуунугар волоконнай-оптическай сибээс лииньийэтин тардыыны хааччыйыахтаах. Үбүлээһин тэҥ өлүүгэ олоҕуран ыытыллар: федеральнай бүддьүөт уонна өрөспүүбүлүкэ 5,5-тии млрд солкуобайы уктулар.
«Биһиги Чукотканы кытта холбоһуохпут уонна Хотугу Муора суолун, ол трансарктическай уу аннынааҕы кабелларын кытта сибээстэһиэхпит. Түмүгэр, дойду хотугулуу-илиҥҥи өттө инфокоммуникационнай куттал суох буолуутун өттүнэн улахан хардыыны оҥоруоҕа», — диэн Айсен Николаев бэлиэтээтэ.
Өлүөнэ муостатын тутуутун хаамыытын туһунан кэпсииригэр, Ил Дархан эбийиэк көхтөөхтүк тутуллан эрэрин Бэрэсидьиэҥҥэ иһитиннэрдэ. Билиҥҥи туругунан, аҕыс тирэх фундамена оҥоһулунна, 208 сыбаайа туруорулунна. Өлүөнэ өрүс сүнньүгэр барар тирэхтэр олохторо буолуохтаах коффердамнары оҥоруу уонна ууга киллэрии үлэтэ салҕанар.
Владимир Путин бырайыак далааһынын бэлиэтээн, тутуу уопсай сыаната 170 млрд солкуобайтан тахса буолуоҕун эттэ.
Айсен Николаев этэринэн, бүгүҥҥү күҥҥэ бырайыагы олоххо киллэриигэ федеральнай бүддьүөт, өрөспүүбүлүкэ уонна инвестордар үптэрин холбоон, 26 млрд солкуобай номнуо туһанылынна. Тутуу графигынан ыытыллар.