Саха сирин бырабыыталыстыбата соҕурууҥҥу оройуоннары уматыгынан хааччыйарга эбии кыахтары үөрэтэр. Бу туһунан брифиҥҥэ өрөспүүбүлүкэ Гражданскай оборуона уонна нэһилиэнньэ олоҕун хааччыйыыга куттал суох буолуутугар миниистирэ Дмитрий Лепчиков иһитиннэрдэ.
«Өрөспүүбүлүкэ салалтатын сорудаҕынан Гражданскай оборуона уонна нэһилиэнньэ олоҕун хааччыйыыга куттал суох буолуутугар министиэристибэҕэ идэлээх биэдэмистибэлэри уонна ньиэп хампаанньаларын кытта үс күн иһинэн соҕуруу оройуоннарга уматыгы эбии аҕалар кыахтары үөрэтэргэ сорудах бэрилиннэ. Бу үлэ түмүгүнэн эбии кээмэйдээх уматыгы тиэйиигэ уонна ону сапыраапкалар нөҥүө атыылааһыҥҥа быһаарыылар ылыллыахтара», – диэн Дмитрий Лепчиков бэлиэтээтэ.
Миниистир эппитинэн, эбии кээмэйдээх уматыкка сыһыаннаах чуолкай быһаарыныылар үлэ болдьоҕо түмүктэммитин кэннэ билиһиннэриллиэхтэрэ.
«Ылыллар дьаһаллар өрөспүүбүлүкэҕэ уматыгынан хааччыйыыны түргэнник чөлүгэр түһэриигэ туһуланаллар», – диэн миниистир эттэ.
Дмитрий Лепчиков тылларынан, билигин ордук тыҥааһыннаах балаһыанньа Саха сиригэр соҕуруу бэлиэтэнэр. Онно сүрүн массыына сырыыта түмүллэр уонна бэнсииҥҥэ ирдэбил үрдүк. Онон сибээстээн, сорох АЗС-тарга уочарат үөскүүр уонна уматыгы биэриигэ быстах кэмнээх хааччахтар киллэриллэллэр.
Саха Өрөспүүбүлүкэтин Бырабыыталыстыбата федеральнай былаас уорганнарын кытта эрэгийиэҥҥэ уматыгынан хааччыйыыны бигэргэтэр үлэни салгыыр. Федеральнай таһымҥа от уонна атырдьах ыйдарыгар уматыгы аҕалыы кээмэйэ уонна кыраапыга номнуо быһаарылынна, дизельнэй уматыгы тимир суолунан быһаччы аҕалыыга сөбүлэһиилэр ситиһилиннилэр, итиэннэ авиационнай уматыгынан хааччыйыы эмиэ быһаарылынна.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата