Саха сиригэр оскуола лесничествотын хамсааһына экологическай үөрэхтээһин биир сүрүн көрүҥэ буолар.
Бу үлэ Арассыыйа бэрэсидьиэнэ Владимир Путин көҕүлээбит «Экологическое благополучие» национальнай бырайыагын сыалын-соругун толорууга туһуланар.
Бүгүҥҥү күҥҥэ өрөспүүбүлүкэҕэ 810 үөрэнээччини түмэр 31 оскуола лесничествота үлэлиир. Кинилэр ойууру харыстыыр, көмүскүүр, саҥаттан үүннэрэр үлэҕэ, экологическай аахсыйаларга, айылҕаҕа сыһыаннаах куонкурустарга, чинчийэр, сырдатар үлэҕэ көхтөөхтүк кытталлар.
Биир сүрүн тэрээһининэн икки сылга биирдэ ыытыллар Оскуола лесничествотын өрөспүүбүлүкэтээҕи сүлүөтэ буолар. Сүлүөт бүтэһигин 2025 сыллаахха ыытыллыбыта. Манна уопут атастаһаллар, бастыҥ үлэлэри көрдөрөллөр, күрэхтэһэллэр, үөрэтэр былаһааккалар, тэрээһиннэр ыытыллаллар.
Билигин Экология, айылҕаны туһаныы уонна ойуур хаһаайыстыбатын министиэристибэтин көҕүлээһининэн “Бастыҥ оскуола лесничествота-2026” Бүтүн Арассыыйатааҕы кэтэхтэн ыытыллар көрүү-куонкуруска көхтөөхтүк бэлэмнэнэ сылдьаллар. Эрэгийиэннээҕи түһүмэх чэрчитинэн биэс күүстээх хамаанда талыллан, өрөспүүбүлүкэни федеральнай таһымҥа көмүскүөхтэрэ.
СӨ Ил Дарханын уонна Бырабыыталыстыбатын пресс-сулууспата.