Атырдьах ыйын 11 күнүгэр Уус Алдан улууһугар Суоттуга «Түһүлгэ» СК салайааччыта, уопсастыбанньык Е.Н.Гоголева ыҥырыытынан, олохтоох бибилэтиэкэ дьиэтигэр ”Тыа ыалын олоҕун сайдыытыгар настаабынньыктар оруоллара» диэн истиҥ көрсүһүү буолла.
Көрсүһүүгэ СӨ настаабынньыктарын сүбэтин бочуоттаах салайааччыта Божедонова Анастасия Николаевна, СӨ «АПК-ны ресурсанан хааччыйар киин» КХУ консультана уонна СӨ бааһынай хаһаайыстыбаларын уонна тыа хаһаайыстыбатын кээпэрэтииптэрин ассоциациятын толорооччу дириэктэрэ Бочкарева Зарема Романовна кытыннылар. Ону таһынан улуустааҕы дьиэ кэргэн, ыччат бэлиитикэтин управлениетын начаалынньыга, улуус настаабынньыктарын сүбэтин салайааччыта Говорова Наталия Григорьевна, СК салайааччыта, уопсастыбанньык Гоголева Екатерина. «Түһүлгэ» көрсүһүүнү Андросова Валентина Ивановна иилээн-саҕалаан ыытта.
Анастасия Николаевна РФ бэрэсидьиэнэ Владимир Путин настаабынньыктааһыҥҥа ыытар бэлиитикэтин уонна урут Сэбиэскэй кэмҥэ настаабынныктар фабрикаларга, собуоттарга, тэрилтэлэргэ хайдах үлэлээбиттэрин билиһиннэрдэ. Билиҥҥи уустук кэмҥэ ыччаттарбыт тустарыгар настаабынньыктар оруолларын уонна билиҥҥи кэмҥэ наадатын тоһоҕолоон эттэ. Онно эбии настаабынньыктар сайыҥҥы кэмҥэ сиэннэри, оҕолору дьарыктыырга, үлэ үөрүйэхтэригэр иитэргэ дьиэ кэргэн биригээдэлэрин сөргүтэр наадатын эттэ.
Зарема Романовна иһитиннэриитэ эмиэ олус наадалааҕынан, бырактыычаскай сүбэлэри биэрэн, дьон болҕомтотун наһаа тарта, сэргэхситтэ. Оҕуруот аһын үүннэриигэ, граҥҥа хайдах кыттарга, туох ирдэнэрин билиһиннэрдэ. Эдэр хаһаайкалар сибэккилэринэн дьарыктанан, биисинэс оҥостоллорун, бэйэ бурдугун үүннэрэн, остуолга ууруллан ас буолуор диэри дьарыктаналларын, тыа хаһаайыстыбатын исписэлиистэрин онлайн үөрэтэллэрин, тыа хаһаайыстыбатын сайдыытыгар өрөспүүбүлүкэбитигэр бааһынай хаһааайыстыбалар уонна кээпэрэтииптэр хайдах үлэлии сылдьалларын, оҕуруот аһын үүннэриини, о.а.элбэҕи иһитиннэрдэ, сүбэлэри биэрдэ.
Валентина Ивановна улууска ыытар үлэлэрин ыччат, дьиэ кэргэн социальнай бэлиитикэтин уонна настаабынньыктааһыҥҥа үлэлэһэрин билиһиннэрдэ.
Наталия Григорьевна улууска 2020 сылтан настаабынньыктааһыҥҥа сүрүн үлэ хайдах барбытын уонна уопсастыбаннай түмсүүлэр нэһилиэк олоҕор оруолларын кэпсээтэ.
Екатерина Николаевна сэбиэдиссэйдэр түмсүүлэрин ыытар үлэтин билиһиннэрдэ.
Көрсүһүүгэ Суотту «Далбар Хотуттара,” “Илгэ” уопсастыбаннай түмсүү уонна бэтэрээннэр кытыннылар. Суотту нэһилиэгин дьаһалтатын баһылыгын солбуйааччы Черкашина Надежда Гаврильевна кэлбит ыалдьыттарга махтал тылларын тириэртэ,
Ол кэнниттэн ыалларынан сылдьыы буолла. 2003 с. “Силис “ дьиэ кэргэн биригээдэлээх, урут бааһынай хаһаайыстыба буола сылдьан баран, билигин бочуоттаах сынньалаҥҥа олорон оҕуруот, сибэкки уонна мас олордуутунан, сылгы иитииитинэн дьарыктанар Варвара Захаровна, Иннокентий Степанович Стрекаловскайдар билигин сиэннэрин дьиэ ис-тас үлэтигэр уһуйа сылдьаллар.
Бэтэрээн-учуутал Иванова Евдокия Иннокентьевна дьиэ кэргэнэ улуус, өрөспүүбүлүкэ спортивнай олоҕор ситиһиилээҕин элбэх мэтээллэр туоһулууллар. Ииһинэн, оҕоруот аһын, сибэкки үүннэриинэн дьарыктанар. Ону таһынан «Далбар”дьахталлар түмсүүлэригэр саха таҥаһын тигэн, дьоҥҥо таҕаталлар .Быйылгы дьылга эр дьоҥҥо аналлаах саха таҥаһын тигэн кэргэттэрин киэргэппитэр.
Раиса Егоровна уонна Михаил Михайлович Охлопковтар бочуоттаах сынньалаҥҥа олороллор. 2000-2006 сылга диэри «Ситим” дьиэ кэргэн биригээдэтинэн түөлбэ олохтоохторун, иистэннэҥнэри түмэн иистэнэллэр. Оҕоруот, сибэкки арааһын үүннэрэллэр.
Дьэ, ити курдук, Гоголева Екатерина Николаевна тэрийэн, салайан Суотту хоһуун дьахталларын кытта көрсөн, кэпсэтэн, ыалларга сырытыннаран тыа ыалын олоҕун сайдыыта, көлүөнэ ситимэ настаабынньыктартан тутулуктааҕын бигэтик өйдөөн, көрсүһүү кыттыылаахтара бэйэлэрин түмсүүлэрин тэрийэн хамсатыахтара диэн бигэ эрэл санаалаах тарҕастыбыт.
Н.Г.ГОВОРОВА, Уус Алдан улууһун настаабынньыктарын сүбэтин салайааччыта
