Бүгүн Саха Өрөспүүбүлүкэтин Баһылыгын иһинэн үлэлиир Муора сэбиэтин мунньаҕа ыытылынна. Мунньаҕы Ил Дархан Айсен Николаев иилээн-саҕалаан ыытта.
Мунньахха трансарктическай тырааныспар көрүдүөрүн сайыннарыы, устар аал куттала суох буолуутун уонна өрүс флотун саҥардыы боппуруостарын быһаарыстылар.
— Арктика бырайыактара өрөспүүбүлүкэҕэ чопчу түмүгү биэриэхтээхтэр, үлэ миэстэтин таһаарыахтаахтар, тэрилтэлэргэ сакааһынан хааччыйыахтаахтар уонна таһаҕас тиэйиитин эрэллээх оҥоруохтаахтар.
Бүгүҥҥү Муора сэбиэтин мунньаҕар көрүллүбүт сүрүн ыйытыылартан биирдэстэрэ — «Мохэ – Найба» норуоттар икки ардыларынааҕы тырааныспар көрүдүөрүн бырайыага буолла. Бырайыак быһыытынан Амур уобалаһынан уонна Саха сиринэн ааһан, Найба оройуонугар пуорка уонна Хотугу муора суолугар тахсыахтаах. Пуорду тутууну, тырааныспар уонна энэргиэтикэ инфраструктуратын баайдаах сирдэри баһылааһыны кытта ситимнээн, бырайыагы сиһилии үөрэтэргэ сорудахтаатым, — диэн Ил Дархан МАХ ханаалыгар суруйда.