Саха сирин тустууга оскуолатын иитиллээччилэрэ Владимир Егоров уонна Арыйаан Тютрин Европа чөмпүйэнээтигэр кыттарга бэлэмнэнэллэр. Күрэхтэһии муус устар 20–26 күннэригэр Албанияҕа буолуоҕа.
Аан дойду чөмпүйэнээтин боруонса мэтээлин хаһаайына Арыйаан Тютрин үгэс курдук 57 киилэҕэ диэри ыйааһыҥҥа Беларусь өрөспүүбүлүкэтин аатыттан тустуоҕа. Кинини кытта Европа чөмпүйүөнэ Сербияттан Азамат Тускаев, бу күрэхтэһии призердара Азербайджантан Ислам Базарганов, Грузияттан Роберти Дингашвили, Германияттан Хорст Лер, Арассыыйа чөмпүйүөнэ Муса Мехтиханов уонна да атыттар күөн көрсүөхтэрэ. Бу ыйааһыҥҥа тустууктар муус устар 24 күнүгэр көбүөргэ тахсыахтара.
Европа чөмпүйүөнэ Владимир Егоров Македония сүүмэрдэммит хамаандатын састаабыгар кыттыаҕа. Кини 61 киилэҕэ диэри ыйааһыҥҥа тустар. Манна Албанияттан аан дойду чөмпүйүөнэ Зелимхан Абакаров, Арменияттан Европа чөмпүйэнээтин элбэх төгүллээх кыайыылааҕа Арсен Арутюнян, Азербайджантан аан дойду призера Нураддин Новрузов, Арассыыйаттан Олимпиада оонньууларын кыайыылааҕа, Европа билиҥҥи чөмпүйүөнэ Заур Угуев тустуохтара. 61 киилэҕэ диэри ыйааһыннаах тустууктар муус устар 25 күнүттэн күрэхтэһиини саҕалыахтара.