Оҥоһуу өй (ИИ) биһиги үлэбитигэр уонна күннээҕи олохпутугар сыһыаммытын тосту уларытар кэмигэр олоробут. Ол иһигэр, Оҥоһуу өй көмөтүнэн оҥоһуллубут муусуканы арыт тыыннаах муусукаттан араарыа да суохпутун сөп курдук буолла. Ол да иһин, муусука эйгэтигэр оҥоһуу өйү туттуу тула мөккүөр билигин да уҕараабат.
Бүгүн биһиги “Итии чэй” рубрикабытыгар дьэ, бу эйгэни баһылаабыт дьикти суоллаах-иистээх Николай Азаматович Попову-Суор Суругу кытары кэпсэттибит.
— Мин Ньурба улууһун Ньурбачаан орто оскуолатын 1992 сыллаахха бүтэрбитим. Оскуола саҕаттан муусуканан дьарыктаммытым. Дьокуускайга култуура уонна ускуустуба кэллиэһигэр аранжировщик үөрэҕэр киириэхпин баҕарбытым да, ити сыл ол отделение арыллыбатаҕа. Ол иһин, “сир ыла тураары”, хореография отделениетыгар туттарсан киирбитим. Эһиилигэр эмиэ арыллыбатаҕын иһин, 2 сыл үөрэнэн баран тохтообутум.
Айар үлэттэн тэйэ быһыытыйан, дойдубар тиийэн үлэ үөһүгэр түспүтүм. Кафе арыйан үлэлэппитим, Ленскэйтэн пиломатериал аҕалан атыылыы сылдьыбытым. Оччоттон да туох да үлэттэн толлон турбат киһибин. Төрөппүттэрбэр соҕотох оҕобун. Үрдүкү Айыыһыттарым үчүгэйдик көрөннөр, дьоҕур син баар: уруһуйдуубун, маһынан уһанабын, хоһоон айабын, муусука үстүрүмүөннэригэр барытыгар оонньуубун.
— Эн айар суолгун кэтээн көрдөххө, туспа суоллааҕыҥ, ураты эйгэлээҕиҥ биллэр.
— Киһи барыта биир буолбат, киһи буолан баран киһиттэн туох эрэ уратылаах буолуохтааххын. Кырдьыга да, мин ураты эйгэни көрдүүбүн. Хата, биһиги олохпутугар Оҥоһуу өй киирэн, айар үлэбин кэҥэтэр кыах баар буолла.
— Судургутук быһаардахха, Оҥоһуу өйгө ырыаны хайдах оҥороҕун?
— Мин Оҥоһуу өйү мусукаалынай үстүрүмүөн курдук туттабын. Промпт суруйабын. Ол аата…
(Сиһилии «Саха сирэ» хаһыат 19 күнүнээҕи нүөмэригэр ааҕыҥ)