Өлөөн улууһугар халлаан туруга урукку сыллардааҕар олох биллэрдик уларыйбытын олохтоохтор бэлиэтииллэр. Бастакы ардах ыам ыйын саҕаланыыта түһээччи, оттон билигин хаһан баҕарар ардах, хаар түстэҕинэ киһи соһуйбат.
Ыам ыйыгар түүн улаханнык тоҥорооччу, билигин оннук көстүү суоҕун кэриэтэ. Улахан самыырдаах өксүөн күннэр ыам ыйын ортотугар буолааччылар. Тыаҕа сылдьар киһи итини барытын кэтии, бэлиэтэнэ сылдьар идэлээх.
Убайдарым урут таба ыстаадатыгар үлэлии сылдьан, суруммут тэрээттэрин арыйталаан ааҕар киһи, элбэҕи билиэ этэ. Хас хонук, ханнык сиргэ тохтоон табаны аһаппыттарын, тыһы таба үөрүн ханна төрөппүттэрин, баччаҕа хас тугут төрөөбүтүн, муойкаларын ханан хаайан күөйбүттэрин — барытын күн аайы сурунар буолаллара. Оннук бэлиэтэнии эһиилги сылга көһөр маршруттарыгар тиийэллэрин көрүнэллэригэр улахан көмөлөөх буолара. Таба үөрүн күөйэ, аһата сылдьан көһөн тиийэн хонор сирдэригэр тиийэ үөрэтэллэрэ. Эһиил кыһын ханна кыстыахтаах сирдэрин быйыл табаҕа тэбистэрбэт буолаллара. Тэтэрээккэ бэлиэтэниигэ оннооҕор хас куул бурдук, саахар туттуллубутун кытта киллэрэллэрэ.
Иллэрээ түүн ардах түһэн саҕалаан баран, бэҕэһээ сарсыарда тохтообута. Сайыҥҥы курдук уулаах буолан, хаары лаппа хаптаппыта. Хаар анна номнуо уу буолбут. Быйыл кыһын хаар улаханнык түспэккэ туран баран Саҥа дьылтан бэттэх сааскы ыйдарга эбии хаардаан, хаар халыҥ буолла. Сир илийэрэ буоллар, күһүн сир аһа өлгөм быйаҥнаахтык үүнүө этэ.
Надежда Колодезникова, Өлөөн.
Хаартыска: Н.Колодезникова түһэриитэ