Бүгүн, кулун тутар 21 күнүгэр, офтальмология өрөспүүбүлүкэтээҕи килиниичэскэй балыыһатыгар офтальмология тирээн турар боппуруостарыгар аналлаах үгэс буолбут научнай-бырактыычаскай кэмпириэнсийэ Москваттан кэлбит эспиэрдэр кыттыылаах буолла.
Ону сэргэ балыыһа базатыгар устудьуоннары уонна ординатор-быраастары үөрэтэр анал лаборатория арылынна.
Саҥа лаборатория үөрэтэр тэриллэринэн толору сэбилэммит. Ол туһунан Соҕуруу Африкаттан кэлэн ординатураны бара сылдьар эдэр быраас Брэндон Мадува:
«Бу лаборатория-хоско барыта табыгастаахтык оҥоһуллубут, онон офтальмолог буолуон баҕалаах устудьуоннарга олус интэриэһинэй, бэл, киһи настарыанньата көтөҕүллэр. Бу балыыһа мэлдьи туох эрэ саҥа хамсааһыннары таһаарар, үүнэр-сайдар. Онон быраактыканы бара сылдьар ханнык баҕарар киһиэхэ уонна эдэр исписэлиистэргэ олус туһалаах. Ол иһин мин манна хаалан үлэлиэхпин баҕарабын», -– диэн санаатын үллэһиннэ.
Симона Симонова, Арассыыйа судаарыстыбаннай мэдиссиинискэй академиятын офтальмологияҕа кафедратын ассистена:
-Мин балыыһа дьаһалтатыгар олус наадалаах кэмпириэнсийэҕэ ыҥырбыттарыгар махтанабын. Бэҕэһээ килииникэҕэ сылдьан, көрөн-истэн баран олус үөрдүм. Балыыһа, ол иһигэр эпэрээссийэлиир блоктар, үрдүк технологиянан толору сэбилэммит, маршрутизация олус сөпкө оҥоһуллубут, улахан киһиэхэ эрэ буолбакка, оҕолорго эмиэ көмө биир сиргэ оҥоһуллара бэртээхэй! Мин билэрбинэн офтальмология балыыһата элбэх салаалаах. Онон, бары нэһилиэнньэҕэ наадалаах көмөнү миэстэтигэр оҥоро сылдьалларыгар эрэллээхпин.
Бүгүҥҥэ кэмпириэнсийэ формата да олус интэриэһинэй. Кэмпириэнсийэ саҕаланыытыгар бастаан сүрүн дакылааттары иһиттибит, онтон кыттааччылар уопуттарын атастаһыахтара, үлэ уратытын дьүүллэһиэхтэрэ. Мин дойдубут элбэх эрэгийиэнигэр сырыттым. Эһиги килииникэҕит миэхэ үчүгэй эрэ санаалары хаалларда.
Иван Луцкан, Офтальмология өрөспүүбүлүкэтээҕи килииничэскэй балыыһатын кылаабынай бырааһа:
«Биһиги маннык кэмпириэнсийэни мэлдьи кулун тутарга ыытабыт. Тоҕо диэтэххэ, Илин эҥэр уонна атын да улуустарга баар биир идэлээхтэрбитин ыҥырабыт. Аны сайын эмиэ ыытарга былаанныыбыт. Атын эрэгийиэннэртэн биир идэлээхтэрбитин, наука-килииникэ кииннэриттэн сүрүн исписэлиистэри ыҥыран уопуту атастаһыы наука иннин диэки баран иһэригэр уонна саҥа билиини быраактыкаҕа туһанарга көҕүлүүр. Ыҥырыллан кэлбит эспиэрдэрбит РФ Доруобуйатын харыстабылын министиэристибэтэ офтальмология салаатыгар өҥөнү оҥорууга киллэрбит саҥа бэрээдэгин, уларыйыылары билиһиннэриэхтэрэ.
Офтальмология салаата хаһан да бииргэ сиргэ туруо суоҕа. Онон биһиги саҥа уларыйыылары кэтээн көрөргө, саҥа технологиялары туһанарга кыһаллабыт. Бу кэмпириэнсийэ биһиги быраастарбыт эрэ буолбакка, улуустар быраастара кытталларыгар улахан суолталаах. Кинилэр миэстэтигэр сүрүн көмөлөһөөччүлэрбитинэн буолаллар.
Онтон бу лабораторияны арыйыыбыт өссө улахан суолталаах. Билигин быраактыканан дьарыктанар килиниичэскэй исписэлиистэрбит устудьуоннары эмиэ үөрэтэллэр. Онон быраактыкаҕа, наукаҕа билиилэрин устудьуоннарга иҥэрэллэр. Ол да иһин, биһиэхэ атын судаарыстыбатттан эмиэ кэлэн үөрэнэллэр, үлэлии хаалыахтарын баҕараллар.
Николай Гоголев, ХИФУ мэдиссиинэ институтун дириэктэрэ:
-Офтальмология балыыһата хайа күн арыллыаҕыттан мэдиссиинэ институтун устудьуоннарын үөрэтэргэ сүрүн килиниичэскэй базанан буолар. Биһиэхэ офтальмология базовай кафедрата 2019 сыллаахха арыллыбыта. Салгыы үүнэн-сайдан, балыыһа кылаабынай бырааһа Иван Луцкан, ХИФУ ректора Анатолий Николаев уонна мэдиссиинэ института бииргэ үлэлээммит бүгүн саҥа лаборатория арылынна.
Кафедра арыллан, исписэлиистэрбит бэйэлэрин маастарыстыбаларын, билиилэрин устудьуоннарга биэрэллэр, устудьуоннары үөрэтэн бэйэлэрэ эмиэ үөрэнэн наука өттүнэн бараллар. Онон сотору кэминэн офтальмология балыыһатыгар наука хандьытааттара баар буолалларыгар эрэнэбит.
Бүгүҥҥү кэмпириэнсийэ доруобуйа харыстабылын сайдыытын таһымын көрдөрдө. Быраактыка, наука, үөрэх холбоһуктаах күүстэринэн үчүгэй түмүктэр ылыллаллар.
