«Лучшие реализованные проекты Горного улуса» сурунаал иккис таһаарыыта сүрэхтэннэ.
Саха Өрөспүүбүлүкэтигэр 2017 сылтан олохтоммут Гражданскай көҕүлээһиннэри өйүүр күҥҥэ, Бэрдьигэстээххэ П.Аввакумов аатынан киин модельнай бибилэтиэкэҕэ кэскиллээх санаалаах, уопсастыба олоҕун хамсатааччы, тэрийээччи көхтөөх дьоммут-сэргэбит «Лучшие реализованные проекты Горного улуса» сурунаал иккис таһаарыытын сүрэхтэниитигэр түмүстүлэр.
Үөрүүлээх күҥҥэ улууспут сайдыытыгар бииргэ үлэлиир салайааччыларбыт – «Горнай улууһа» муниципальнай оройуон баһылыгын эбээһинэһин толорооччу Сардаана Стручкова, СӨ социальнай коммуникацияларга уонна ыччат дьыалаларыгар министиэристибэ сүрүн исписэлииһин э.т. Елена Дьячковская, СӨ үп министиэристибэтин өрөспүүбүлүкэтээҕи казначейство бүддьүөтү көҕүлүүр салаатын сүрүн эксперэ Елизавета Егорова, Хаҥалас улууһуттан социальнай политика салаатын салайааччы Наталья Григорьева ыалдьыттаатылар.
Сүрэхтэммит «Лучшие реализованные проекты Горного улуса» сурунаал иккис таһаарыытыгар 2018-2025 сс. кэрдиис кэмҥэ олоххо киирбит 42 бырайыак, ону таһынан ППМИ (олохтоохтор көҕүлээһиннэрин өйүүр) федеральнай бырагыраама чэрчитинэн олоххо киирбит бастыҥ бырайыактар түмүллэн киирдилэр.
Сурунаал Горнай улууһун дьаһалтатын үбүлээһининэн 116 ахсаанынан бэчээттэннэ. Бырайыак куратора Петр Аввакумов аатынан киин модельнай бибилэтиэкэ иһинэн үлэлиир «СИТИМ» сайдыы эйгэтин проектнай үлэҕэ исписэлииһэ Семен Семенов. Сурунаал матырыйаалын хомуйан, дизайнын, компьютернай версткатын оҥордо «СИТИМ» сайдыы эйгэтин проектнай үлэҕэ исписэлииһэ Саргылаана Петрова.
Өссө сонун бырайыактар олоххо тиһигин быспакка киирэ туралларыгар бу хомуурунньук төһүү-күүс, тирэх буоларыгар эрэнэбит.
Мария Павлова
П.Д. Аввакумов аатынан киин бибилэтиэкэ бибилэтиэкэрэ.