Кулун тутар 29 күнүгэр Дьокуускай куоракка «Старый город» балаҕаныгар Поэзия аан дойдутааҕы күнүгэр олоҕуран, 1976 сыллаахха орто оскуоланы бүтэрбит «Золотой выпуск» көрсүһүүлэрэ буолла.
Бу «Выпуск-76» бөлөх тэриллибитэ ыраатан, уйаара-кэйээрэ биллибэт, киэҥ нэлэмэн Саха сирин араас улуустарыттан бөлөххө 200 киһи буолбут. Кэмиттэн кэмигэр көрсүһүүлэри тэрийэн, оҕо саастарыгар түһэллэр эбит. Бэйэлэрин истэригэр актыыптары талан, «Уонна хаһан…» бачыымынан үлэлээн, чуораанныы чугдааран ааспыт дьоллоох оҕо саастарыгар түһэн, санаа атастаһан, ыллаан-туойан, үҥкүүлээн-битийэн, «сааһырдыбыт» диэн олорон хаалбакка олох үөһүгэр сылдьаллар.
Саха сиэринэн балаҕан көмүлүөк оһоҕун күүдэпчилэтэ оттон, арыылаах алаадьынан айах тутан, Айыы иччилэриттэн көҥүл ылан, толору астаах остуолга олорон, микрофон чугдааран олордо. Биһиги Уус Алдан Суоттутуттан төрдүө саҥа кэлбит дьон буолан, бастаан кирик-хорук туттан, муннугу кэйиэх курдук буолан иһэн, үөлээннээхтэрбит үөрүүлэригэр олорсон, кинилэр тыыннарыгар киирэн хааллыбыт.
Бастаан гимн «Выпуск-76» суруйуутугар куонкурус кыайыылаахтарын иһитиннэрэн, наҕараадалары туттардылар. Үһүс миэстэни Уус Алдан Өнөрүттэн Петр Атласов ылан үөрдэ-көттө, иккис миэстэҕэ Уус Алдан Суотту олохтооҕо Иннокентий Попов тиксэн омунугар оҕолуу ыстаҥалаата. Бастакы бочуоттаах миэстэни Орто Халыматтан сылдьар, култуура үлэһитэ Люция Бандерова-Айыллаана ылыан ылла. Айыллаана хоһоонугар матыып айан, муусука оҥотторон «Выпуск-76» гииминин ыллаан сүрэхтээтэ. Онон биһиги көлүөнэ гииминнэнэн олохтоохтук оҥоһуннубут. Сыыйа бэйэни билиһиннэрии, дорҕоонноохтук бэйэ айбыт хоһоонун ааҕыыта, дьону хоһоон ыллыгар сэмээр сиэтэн киллэрдэ. Хайдах эрэ киэн тутта санаатым: биһиги көлүөнэ ыччата талааныттан. Мелодистар бэйэлэрин ырыаларын ыллаан, үҥкүүлэтэн да биэрдилэр. Көрү-нары көҕүлүттэн тутан, араас оонньууларга кыттыһан, ким да туора туран хаалбакка, бириистэргэ тиксэн оҕолуу үөрдүбүт-көттүбүт. Сахалыы киэҥ-куоҥ балаҕан сырдык эйгэтигэр куустардыбыт. Ол быыһыгар инники былаан торумнанна, улахан көрсүһүү сайын буолара былааннанна.
Бу суруйуубар кими эмит киллэрбэтэх буоллахпына, алы гыныҥ. Саҥа киһи буолан ааккытын-суолгутун билбэппин, ырыа куттаах үөлээннэхтэрбин ахтыбатахпар хомойумаҥ. Арай, бу тэрээһиҥҥэ ыраах Өймөкөөнтөн, Орто Халыматтан, Бүлүү бөлөх улуустарыттан, онтон да атын улуустартан сыал-сорук оҥостон кэлбиттэргэ махтаныах эрэ тустаахпыт. Аан дойду поэзиятын күнүгэр анаммыт «Оскуола олоҕум биһигэ» тэрээһин бэйэтин сыалын ситистэ. Мин артыыс, суруйааччы да буоларым быһыытынан, син элбэх тэрээһиҥҥэ сырыттаҕым. Ол эрэн, оҕолуу мэниктээн, күлэн-үөрэн, маннык оҕо сааспар түспүппүн өйдөөбөппүн. Үөлээннээхтэр көрсүһүүлэрэ ураты тыыннаах буолар эбит.
Түмүкпэр, үрдүктэн үрдүк таһымнаах көрсүһүүнү тэрийбит дьоннорго барыларыгар, саҥа атастары-доҕоттору бэлэхтээбит тэрийээччилэргэ, тэрээһиҥҥэ сылдьыбыт Уус Алдан Суоттутун дьонун аатыттан барҕа махталбытын этэбит. Уонна хаһан…
Оҕо саас доҕотторо
Оҕо сааспыт кэрэтэ
Орой мэник кэмнэрбит,
Олус дьоллоох күннэрэ
Ахтар-саныыр сылларбыт.
Олох түһүн тутуһа
Оскуолаҕа киирбиппит,
Уруокка боччумура
Ааҕарга үөрэммиппит.
Учуутал кыһамньыта
Уһуйбута билиигэ,
Уруокка үөрэппитэ
Угуйбута сайдыыга.
Алтан чуораан чугдаара
Оскуолаттан атаарбыта,
Оҕо сааспыт доҕотторо
Ахтылҕаҥҥа хаалбыта.
Элэс гынан аастаҕа
Эдэр-эрчим саастарбыт,
Эмэн кэммит кэллэҕэ
Эбээ-эһээ буоллахпыт.
Иннокентий ПОПОВ-ОҔУРУОТТААХ
