Кыһыҥҥы улук ууттан айылҕа уһуктуутун, күн уһуурун уруйдуур үөрүүлээх бырааһынньык буолла. Бу көлүөнэттэн-көлүөнэҕэ тиэрдиллэн күн бүгүнүгэр тиийэ ыытыллан кэллэ.
Биир сиргэ түөлбэлээн, доҕордуу олорор омуктар буоларбыт быһыытынан, сахалар бу үтүө үгэһи ылынан сыллата кырыа кыһыммытын атаарабыт, сандал сааһы уруйдуубут.
Ол курдук, Атамайга үтүө үгэскэ кубулуйбут кыһыны атаарыы норуот күүлэйэ Арассыыйаҕа — Норуоттар сомоҕолоһууларын, Саха сиригэр — Култуура, Горнай улууһугар — Доруобуйа , Атамай нэһилиэгэр — Эт-хаан сайдытын сылларыгар аналлаах «Дорообо, сандал саас» диэн кыһыны атаарыы тэрээһиммит бэрт сэргэхтик буолла. Тэрээһин чэрчитинэн түөлбэлэр икки ардыларыгар күрэхтэһиилэр ыытылыннылар. Бу күүлэйгэ ыытыллыбыт күрэстэр түөлбэ сыллааҕы кэлим отчуотугар киирсэр буолан, ох курдук оҥостон кэлбиттэрэ киһини үөрдэр.
Күрэстэр «Кухня единства народов» элбэх көрүҥнээх омук бүлүүдэтин астааһыныгар, “Битва частушек” көрдөөх частушкаҕа, “Шашлык — дело тонкое” шашлык буһарыы күрэһэ буолан ааста.
Биир сонун көрүҥүнэн аһаҕас халлаан анныгар– шашлык буһарыы буолла. Түөлбэлэр буһарар састааптарын, иһиттэрин-хомуостарын, оһохторун аҕалбыттар, мастарыгар тиийэ тиэнэн кэлбиттэр. Аныгы үйэҕэ тиэнэ сылдьарга табыгастаах, бэйэтэ оһохтоох, араас моһуоннаах, иһиттэр баар буоланнар, дьыаланы быһаардылар. Күрэс сыанабылыгар бүлүүдэни астаан, киэргэтэн ууран биэрии уонна буоларын курдук, амтанын мааныта учуоттанна.
Күрэс түмүгэр кыайыылаах “Кэскил” түөлбэ (салайааччы Павлов Е.Г.) буолан таҕыста уонна сыллааҕы түөлбэ икки ардыгар күрэскэ баал ыллыллар. Кыттыылаахтарга бука барыларыгар туоһу суруктар, бириистэр туттарылыннылар.
Ону таһынан, тэрилтэ икки ардыгар эстэпиэтэҕэ илин-кэлин түсүһүү буолла. Уопсайа күрэскэ икки хамаанда “Радуга” оҕо уһуйаана уонна В.Д.Лонгинова аатынан Атамай орто оскуолата кытыннылар. Сэттэ түһүмэххэ кыттаннар кыайыылаах “Радуга” оҕо уһуйаана буолан таҕыста. Кыайыылаахтарга туоһу сурук уонна бириис туттарылынна. Маны таһынан оҕолорго 12 төгүлүн “Сааскы таммахтар” хоһоон күрэһэ ыытылынна. Иилээн-саҕалаан олохтоох бибилэтиэкэ салайааччыта Елизавета Николаевна Ефремова ыытта. Уопсайа 19 оҕо кыттыыны ылла.
Кыайыылаахтарынан буоллулар:
Детсад оҕолоругар:
1 м. – Попов Матвей
2 м. – Ефремов Сандал
3 м. – Адамов Тихон
Оскуола оҕолоругар:
1 м. – Яковлев Коля
2 м. – Федоров Чаҕыл
3 м. – Иванова Дильнара
Ону тэҥэ, биирдиилээн кыттааччыларга эр дьоҥҥо уонна дьахталларга хаатыҥка быраҕыыта, массыына соһуута буолан ааста.
Кыайыылаахтар:
Хаатыҥка быраҕыытыгар:
Эр дьоҥҥо – Захаров Савва
Дьахталларга – Жиркова Сааскылаана
Массыына соһуутугар:
Эр дьоҥҥо – Иванов Василий
Дьахталларга – Иванова Розалия
Уолаттарга – Иванов Айгылаан
Тэрээһиҥҥэ тэрилтэлэр салайааччылара Ефремова Мотрена Николаевна, Федорова Диана Степановна, түөлбэлэр салайааччылара Павлов Ефим Георгиевич («Кэскил» түөлбэ), Яковлев Дмитрий Николаевич ((«Эрчим» түөлбэ), Петрова Гуля Анатольевна («Үрдэл» түөлбэ) түөлбэлэрин, тэрилтэлэрин олохтоохторун, кэлэктииптэрин түмэн бэртээхэйдик тэринэн кэлбиттэрэ бырааһынньык тыынын өрө көтөхтө. Түгэнинэн туһанан, тэрилтэ салайааччыларыгар, түөлбэ олохтоохторугар барҕа махталбытын тириэрдэбит.
Анна Дмитриева
Анна Дмитриева хаартыскаларга түһэриитэ