Бүгүн Туймаада хочотун килбэйэр киинигэр, Дьокуускай куоракка, Арчы дьиэтигэр сэргэх тэрээһин дьону-сэргэни түмтэ.
Бу «Олох оһуордаах оһуохайа» тэрээһини Таатта улууһа иилээн-саҕалаан ыытта. Тэрээһин Арассыыйаҕа — Норуоттар сомоҕолоһууларын, Саха сиригэр — Култуура, Таатта улууһугар — Айар ситим сылларынан ыытылынна.
Төрүт үҥкүү түһүлгэтигэр — оһуохай дьоро күнүгэр Дьокуускайга олорор таатталар дойдулаахтарын ыҥырыыларыгар сүргэлэрэ көтөҕүллэн, үөрэн-көтөн, эрдэттэн оҥостон, кустук курдук куоһанан түмүстүлэр. Түһүлгэҕэ кэлбит дьоҥҥо сиэри-туому тутуһан алгыс бастыҥа этилиннэ. Салгыы иили эргийэр оһуохайга бука бары көхтөөхтүк кыттан, тоҥолохтон тутуһан оһуохайдаан дьиэрэттилэр. Бэлиэтээн эттэххэ, бүгүҥҥү маанылаах түһүлгэҕэ улууска, өрөспүүбүлүкэҕэ биллэр-көстөр ааттаах-суоллаах улахан оһуохайдьыттар кыттыыны ыллылар. Кинилэри сэргэ, эдэрдэр, оҕолор кэлэн оһуохайдаспыттара үөрүүнү үксэттэ.
Тэрээһиҥҥэ мустубут ыалдьыттар дойдулаахтарын көрсөн ирэ-хоро сэһэргэстилэр, санааларын үллэһиннилэр, хаартыскаҕа түстүлэр.
Ытык-мааны кырдьаҕастар ох курдук оҥостон кэлэннэр, анаан-минээн олорон саахыматтаатылар. Маны сэргэ, ырыа-тойук, үҥкүү-битии оройуттан тутулунна.
Бу күн «Таатта бэлэҕэ» сувенирдары, «Талах Бэргэн тыксааны» дьон-сэргэ хамаҕатык атыыласта.
Дьокуускай олохтоохторугар, биир дойдулаахтарыгар, оһуохайы сэҥээрээччилэргэ анаан Таатта улууһуттан быйыл иккис кэлиилэрэ. Бу туһунан улуустааҕы норуот айымньытын дьиэтин сүрүннүүр методиһа, оһуокай түмсүүтүн салайар Иван Иван маннык кэпсиир:
Өрөспүүбүлүкэтээҕи «Оһуохай» уопсастыбатын бэрэссэдээтэлин солбуйааччыта Марта Николаева бүгүҥҥү тэрээһин туһунан санаатын үллэһиннэ:
— Бүгүҥҥү тэрээһин үрдүк таһымнаахтык ааста. Дархан этээччи Афанасий Попов алгыһынан Таатта оһуохайын күнэ саҕаланна. Үс көлүөнэ этээччи кэлбитэ барыбытын да олус үөртэ. Бу ытык Тааттаҕа оһуохай үрдүк таһымнаахтык баран иһэрин, кэнчээри ыччат такайылларын, уһуйулларын көрдөрдө. Манна оһуохайы сэргэ ырыа-тойук тардылынна. Ыччаттар ырыаларын олус сэргээтибит, ытыс тыаһынан арыаллаатыбыт, дьон-сэргэ үҥкүүлээн тэйдэ. Тааттатааҕы оһуохай түмсүүтүн салайар Уйбаан Уйбаныап анал бирииһин улары анаан-минээн аҕалбыт. Ону саамай саастаах ыалдьыппыт — Дьааҥыттан төрүттээх, 89 саастаах Петр Петрович Слепцов ылан наһаа үөрдэ. Ытык кырдьаҕас маннык мааны түһүлгэҕэ таатталартан күндүлэнэн олус үөрбүтүн, астыммытын биллэрдэ, махтанна. Бүгүҥҥү оһуохайы, тэрээһини тэрийбит, Таатта улууһун норуот айымньытын дьиэтин фольклору сүрүннүүр методиһа Майя Гаврильевна Егороваҕа, түмсүү салайааччытыгар Уйбаан Уйбаныапка ис сүрэхпититтэн махтанабыт. Сэргэх тэрээһин буолла.
Бу күн өргө диэри оһуохай дуорайда, ырыа-тойук тардылынна, үҥкүү-битии, оонньуу-көр оройуттан тутулунна. Ону сэргэ, «Саха сирэ» хаһыакка сурутуу ыытылынна. Манна даҕатан эттэххэ, оһуохай түмсүүтэ хаһыаты кытта ыкса үлэлэһэр баҕалааҕын биллэрдэ. Түмүккэ хаһыакка суруппут ааҕааччыларбыт кинигэ бэлэх тутан, оһуохайдаан, астына-дуоһуйа сынньанан, сүргэлэрэ улаханнык көтөҕүллэн махтаннылар. «Олох оһуордаах оһуохайа» тэрээһин табылынна, сэргэхсийии буолла.
Хаартыскалар, видео Сардаана Баснаева.